Kaldheim и мобилната Magic: The Gathering Arena

Не знам кога последен пат сум бил вака загреан за нова Magic: The Gathering едиција како зимава за Kaldheim. Веројатно во деновите кога редовно ја следев играта во нејзината оригинална хартиена варијанта, а од тогаш сигурно се поминати некои десет години. Денес единственото што колку-толку ме држи во тек со играта е Magic: The Gathering Arena. Ми беше откровение кога излезе. Постоеја и претходно некои дигитални верзии на играта, ама ништо што играв од тие не ми беше ни приближно добро колку Arena. Ниту со гејмплејот, а уште помалку со колекционерскиот аспект на Magic.

Arena е сè она што некогаш сакав од дигиталната Magic: The Gathering. Бесплатна е, убаво изгледа, анимациите на она што се случува на таблата се мазни и пријатни, можеш да си собираш карти во културно спастрена колекција, а редовно има и различни турнири каде што можеш да си ги испробаш различните декови. Комплетна Magic: The Gathering игра за ваков медиум. Треба едно големо фала да кажеме на Hearthstone што го дотера дигиталниот TCG жанр и воспостави стандарди, особено околу естетскиот дел. Без Hearthstone веројатно сите дигитални верзии на Magic ќе беа тапа како претходно. 

После две-три години од нејзиното постоење, Magic: The Gathering Arena пред неполн месец се појави и за мобилни и како за нешто што е во early access, супер вози. Практично е истата верзија од таа за PC и едвај е прилагодена за мобилен уред, ама еј - имам Magic: The Gathering во џеб! Сега не морам ни да сум на биро за да играм Magic. Можам да играм Magic на телефон додека ми се вари кафето кое планирам да го сркам на биро додека играм Magic од компјутер. Сега не морам ни да правам пауза од Magic кога истото тоа кафе ќе одлучи да ми ги заскокотка цревата.

Замисли колку научно-фантастично би му звучело ова на Бобо од 2005 што можел само да титка од неговиот Сименс А60 зошто штедел за да си купи Magic бустер. Сега истиот тој може да се пресели во веце и пола саат да отвара бустери. Пред Kaldheim сум успеал да приберам некои 70 илјади голд во Arena. Го имав гушнато како змеј некој. Валутата се добива со играње и може да се користи за пазарење бустери, учество во одредени турнири, итн. Едициите кои ги затекнав последниве години не ми беа нешто особено привлечни за се замарам со пазарење бустери и инвестирање во декови, па некако ова дигитално богатство се трупаше и си го чекаше денот.

Пред некое време на Twitch стрим почнав да купувам и отворам бустери со намера да го склопам првиот Kaldheim дек. Kaldheim е новата, актуелна едиција која е инспирирана од нордиска митологија, свет во кој Magic: The Gathering првпат прави ваков исчекор. Божества, викинзи, џуџиња, џинови, елфови, зомбија - буквално сè и сешто хара низ десетте света на Колдхаим. Повеќето се комплетно нови, додека некои како Vorinclex "гостуваат" од трети светови како Миродин.

Интересна е. Картите имаат преубави цртежи, особено варијантите што имаат руни како мотив на рамката, приказната е соодветно адаптирана да се вклопи во духот на играта, а новите механики како Foretell се исклучително динамични и чудотворни за некои декови. Kaldheim успеа да потрефи неколку правилни ноти за да ме заинтригира повеќе од претходните кои се дел од моменталниот Стандард формат и еве ме, ја собирам цела сега. Бидејќи веќе некое време не постојат традиционалните блокови во Magic: The Gathering составени од најчесто три едиции, Kaldheim стои самостојно со 285 карти, што е супер за полесно комплетирање на колекција. Дигитална додуша, ама и тоа е нешто.

Собрав еден куп карти, ама иако мислев дека 70 бустери се доволни да покријат речиси сè - среќата не ми беше баш најнаклонета. Среќа, со секој отворен бустер добиваш wildcards со кои практично можеш да ја испазариш било која карта, па благодарение на нив успеав да прикрпам дек за Kaldheim Constructed ивентот кој конечно ме натера да склопам дек од само Kaldheim карти. Моментално играм Monogreen Snow Aggro, некоја моја варијација базирана на дек што секако го украдов од интернет. 

Со оглед на тоа што извлеков четири Fynn, the Fangbearer од бустери, не можев да не го трупнам и него. Сигурен сум дека е посоодветен за друг тип на декови, ама одлично извозев на Kaldheim Constructed, а успеа да ме изгура и низ Gold Tier на Standard Ranked. Гледам дека за ваков агресивен mono green изборот на карти е поопширен во претходните едиции, па периодов ќе се потрудам да го збогатам и подобрам и со такви. Важно е дека се решив што ќе играм како главен дек. А, со толку Kaldheim карти на располагање, не беше баш најлесно да се направи одлука.

Сакам постепено да склопам и некој Kaldheim дек на хартија. Онака ќефски, барем за домашна употреба. Штета што оваа едиција нема онакви Planeswalker декови веќе склопени и спремни за играње. Идеш си купуваш два такви различни, чао-пријатно. Жалам што не можам да ја искусам Kaldheim асално на хартија на живо, барем не онака како што би можел кога не би била пандемијава. Можам само да се надевам дека ќе се изнабодеме со вакцини додека е уште дел од Standard форматот.

Види такоѓе:

• Изгледа дека Magic: Legends е уште една предвремена првоаприлска смешка
  

Изгледа дека Magic: Legends е уште една предвремена првоаприлска смешка

Очигледно денес секоја онлајн игра со повеќе од еден играч производителите ја рекламираат како MMO, па сите што мислевме дека Magic: Legends ќе биде MMORPG еве сега изгледаме како магариња. Види, технички можеш да се расфрлаш со MMO налепници по игри и да имаш доволно елементи колку да ја оправдаш таквата дефиниција. Веројатно во одредени случаи нема да згрешиш. Mеѓутоа, во овaa ситуација повеќето се согласни дека Perfect World и Cryptic Studios малку манипулаторски ја најавија Magic: Legends минатиот месец. Ете, ако го измениш редоследот на зборовите кои го опишуваат жанрот, можеш тенденциозно да создадеш погрешна слика без да биде "лажно рекламирање".

По помпезното видео соопштение, краткотрајната возбуда околу Magic: Legends ја прекина првото видео во кое се гледа гејмплејот и разјаснува дека ова не е 'action MMORPG' туку 'action RPG', односно досаден шашав Diablo клон со некои минимални онлајн елементи кои не се баш 'massively multiplayer online'. Кога на MMORPG публика ќе ѝ спомнеш 'action', првата и главна асоцијација е борбената механиката и интеракцијата со непријателите, односно метите не ги селектираш со притискање на tab копчето, туку ги нишаниш. Публиката игрите како Tera, Black Desert Online или Elder Scrolls Online ги знае како 'action MMORPG'. 

Ајде еве, ќе речеме дека се работи за недоразбирање и дека публиката можеби има некаква одговорност за сопствените големи очекувања. Ако те насанкале, некогаш сам си крив. Ама, видеата од гејмплејот на Magic: Legends што се моментално достапни изгледаат очајно и тоа е поголемиот проблем. Не може во промотивно видео да ти сецка играта. Неприфатливо е во 2020, без оглед на тоа што си пишал 'pre-alpha footage'. 

Подобро ништо не покажувај отколку да дозволиш секое видео за играта што допрва треба да ја објавиш да ти има повеќе дислајкови отколку лајкови. Можеби доколку самата игра изгледаше барем визуелно попристојно, публиката полесно ќе го занемареше тој "жанровски неспоразум". Буквално нема ништо импресивно или барем малку интересно да се види. Испаѓа како цел буџет да го фукнале на тој првиот тизер.

Magic: the Gathering има опширни светoви и приказни кои континуирано се создаваат и развиват скоро триесет години. Замисли кој потенцијал е тоа за MMORPG. Не очекував од Magic: Legends да дојде и да го качи жанрот на грб да го износи или да е WoW со MtG скин. Нит традиционалниот жанр е популарен денес, нит па Magic: the Gathering како некогаш. Ама, некако е тажно сето тоа да заврши како ваква генеричка игра која веројатно има ужасно мали шанси за успех или профит. Без разлика какви ќе се подобрувањата кои верувам дека после лошиот одзив ќе следат, концептуално пак не ми личи на игра која би можела да е компетитивна во однос на другите во aRPG жанрот денес. Стварно има многу пософистициран избор.

Тука е Path of Exile и нејзините нови експанзии и продолжение, имаш жива и здрава Diablo III, за некој месец и Torchlight Frontiers која ќе биде бесплатна онлајн варијанта на Torchlight. Magic: Legends изгледа смешно во споредба со овие, a сигурен сум дека Perfect World и Cryptic Studios немаат ни добар бизнис модел во план. Да, бесплатна ќе биде, ама тврдам дека ќе пробува да ти го отвори новчаникот на секој чекор како и нивните други игри, пример Neverwinter и Star Trek Online. Гледам дека Magic: Legends користи некаков систем со карти како способности за нејзините четири-пет предефинирани херојчиња и лесно можеш да видиш дека се супер-згодни за продавање за вистински пари. Сепак е ова Magic, нели?

Не знам кој ќе го игра ова, реално. Особено после ова фијаско деновиве. Едно видео што не трае ни минута им изгуби огромен дел од потенцијалните играчи. Не помагаат ни тие видеа што следеа каде што платен тим новинари се трудат да ја фалат и да глумат возбуда додека ја играат. Не знам ни кога точно треба да излезе Magic: Legends, веројатно некаде до крајот на годинава. Доаѓа за PC, неколку конзоли, а сигурен сум дека некогаш и за мобилни платформи зошто изгледа како во некоја фаза да е така дизајнирана. Интерфејсот и едноставниот гејмплеј ме наведуваат да мислам дека додека е развивана се предомислувале за целната група. 

Пропаѓаат проекти, тоа е. Пропаднале и поголеми игри базирани на попопуларна интелектуална сопственост. Жалам што само пак сме години подалеку од асална MMORPG игра базирана на Magic: the Gathering. Уште долго нема талкање низ отворените светови на Миродин, Камигава или Равница каде што ти си Плејнсвокер што сам си го создаваш, нема камера во трето лице, нема масовни групирања со други играчи. Сега ќе можеш само да си кликаш со други двајца во неоптимизиран Diablo клон кон орди генерички зомбија и гоблини.

За крај, има една игра што сакав пред скоро да ја спомнам и моментално добива комплетно спротивен фидбек од овој на Magic: Legends. Исто е изометрична, ама за разлика од ова гомно тука, се рекламира себе како MMORPG и никаде од тоа што до сега излезе можеш да приметиш дека е некаква превара. Да не зборам за тоа колку супериорно изгледа во споредба со гејмџем графичкиот дизајн на Legends. Играта се вика Corepunk и би требало годинава да отпочне некаква бета. Ќе пишам наскоро повеќе, чекам да се присоберат новости. До тогаш обрни внимание, може ќе ја биде.

Добрата дигитална Magic: The Gathering дрога

Две хартиени работи кои мирисаат најпрекрасно на свет се испегланиот кеш изваден од банкомат и новите Magic: The Gathering карти од тазе отворен бустер. Со вториов тип на хартија одамна се немавме прописно дружено, а баш неделава се навршуваат четиринаесет години од мојот прв вистински контакт со оваа игра преку еден Fifth Dawn интро дек што го добив за тогашниот роденден. 

Иако моето и онака кратко несериозно компетитивно играње Magic: The Gathering е одамна завршено, пред некое време си ги откопав картите собирани со години за да се распука некоја партија во домашен амбиент. Всушност, дури и во годините кога најактивно следев што се случува со Magic: The Gathering, искуствата со играта ми беа најинтензивни надвор од официјалните турнири. Или со други зборови - ритуално игравме дома со другари, често и од сабајле до вечер.

Во 2005, а и во следните години, немаше баш некоја алтернатива за кога ќе те причешаат рацете за MTG. Гоблин не работи толку касно, другарите ти се недостапни, а ти се игра. Magic Online не ти е опција, а онаа верзијата за PC од 90-ти не само што не функционира како што треба, туку изгледа прегрозно. Чекаш следен ден додека си ги разгледуваш картите, смислуваш некои комбинации за декови со твоите сиромашни комони и се тешиш дека среќата во играта е значително побитен фактор од цената и реткоста на картите. 

Низ годините мојот интерес околу играта варираше во однос на експанзијата/едицијата што беше актуелна, за на крај комплетно да ми опадне желбата да бидам во тек. Обврските што тогаш дојдоа во животот дополнително предизвикаа да се дистанцирам од MTG. Не го дочекав ни Scars of Mirrodin блокот во 2010, а се сеќавам дека се ложев што приказната се враќа на местото каде што почнав јас. Во следните години сите изиграни партии ми беа дома, со стари карти кои покасно и самите пропаднаа во некои фиоки. 

Сепак, MTG никогаш не ме напушти целосно, а ни мојата фасцинација со самата игра. Често слушав за што е ново, ги играв оние Duels of the Planeswalkers на Стим, ама никогаш не ми се врати истиот порив за емотивно и финансиско инвестирање. Сега и конечно можев да играм Magic: The Gathering на компјутер и против вистински играчи, секогаш кога ќе посакам, а пак не бев целосно внесен. Како може да ја обожавам играта, а да не се стрчам по нови вистински карти?

Крајот на 2018 роварев низ тие папките и кутиите со картите што сум ги собирал. Повеќето ги немав видено со години, за некои не се ни сеќавав дека сум ги поседувал. Единствено MTG нешто што секогаш држев на дофат беше еден внимателно склопуван mono blue control дек од пред осум години. Кога потрчав да се пофалам за некои од картонските артефакти на другарите што некогаш исто играле MTG, за возврат добив препорака за Magic: The Gathering Arena, нова бесплатна игра која од пред некој месец е во отворена бета.

Накратко, Magic: The Gathering Arena е најдобрата дигитална верзија на Magic: The Gathering до сега. Mожеби зошто конечно престанаа да се прават паметни и посебни, па направија игра што визуелниот тон го позајмува од Hearthstone. Не се ни обидуваат да го скријат тоа, а не се ни единствени. Hearthstone ја има најголемата публика за дигитални игри со карти и веројатно кога сакаш да црпнеш делче од таму, побезбедно е да понудиш нешто што на тие луѓе им изгледа познато. 

Таблата е иста таква интерактивна како во Hearthstone, па додека чекаш на противничкиот потег или го смислуваш твојот, исто можеш да си кликаш околу. Слични се и анимациите кога ги играш картите, па и "комуникацијата" со противникот е низ исти облачиња со такви кратки фрази. Толку слично изгледаат двете игри што некогаш сум убеден дека играм Hearthstone со MTG теми и правила.

Сакаш или не, концептот е функционален и привлечен. Тоа е визуелниот стандард со кој Wizards of the Coast се стремат да ја олеснат миграцијата на потенцијалните Hearthstone дојденци и мислам дека добро проаѓа. Освен сличната табла, Arena нуди и сличен визуелен панел за колекцијата на карти. Картите што ги собираш се убаво организирани и многу е лесно и едноставно да правиш измени на постоечките декови и да склопуваш нови. 

А, декови и карти имаш многу, дури и да не отвориш ниеден бустер. Играта е во фаза кога се обидува да привлече публика, па е премногу дарежлива. Низ дневните и неделни квестови собрав околу петнаесетина целосни тематски декови. Целосно бесплатно, што за игра од овој тип ми е некако чудно. Можеш да користиш и вистински пари, меѓутоа овие петнаесет декови, бустерите, картите и ингејм валутата со кои си постојано наградуван, се доволни за да бидеш компетитивен и без да го отвориш новчаникот. Секако, има систем и за добивање на конкретни карти, ама моментално ни тој не е засегнат од оние што би решиле да фрлат вистински пари.

Единствено учеството на одредени турнири се плаќа со вистински пари и не можш да го отклучиш на друг начин, што е сосема океј. Доволно работи се бесплатно на тацна, па веројатно е фер овој аспект да биде монетизиран. Мора некако и компанијата да заработи, нели. Не знам само дали и како би се наплаќале експанзиите. Месецов излегува нова на хартија, а бидејќи приметувам Arena е во тек со анаглогниот MTG Standard формат, веројатно ќе биде веднаш достапна и во дигиталната варијанта.

Сега доаѓаме до оној дел каде што треба да кажам дека Arena ми ја врати желбата за Magic. Супер е да кликаш со кафе, да изиграш неколку партии со лешперскиот црно-зелен Saproling дек, ама ништо не може да го замени она чувство кога ти се потат вистински карти во раце додека го набљудуваш противникот. Не е исто кога влечеш карта од вистинско купче. Што ќе ми е колекција од илјадници дигитални карти ако не можам да ги измрсам со прсти. Magic: The Gathering е посебен фетиш, па колку и да е добра оваа дигитална доза, никогаш нема да е целосна замена.

Ова е тоа што секогаш сум го посакувал од дигитална MTG, ама не и од самата игра. Не можеш Arena да ја понудиш на гости и сите да си поминете јако. Не се носат дигитални карти во викендица или на плажа. Се навратив малку назад низ годиниве "пауза" и гледам дека сум пропуштил многу добри блокови. Да не беше пак Ravnica во моментов веројатно веќе ќе имав нови вистински карти. Се сеќавам на оргиналната Ravnica и многу луѓе тој блок го сметаат за омилен, ама јас никогаш не успеав да се најдам со темата. Ова што било пред некоја година, Amonkhet? Е, тоа е нешто што повеќе ме влече и жалам што сум го пропуштил. Генерички фантастични светови секогаш подобро изгледаат кога ќе ги смешаш со специфична митологија.

Ќе си пукам Arena додека да набавам нови вистински карти. Не само што е најдобра од сите претходни слични Magic: The Gathering игри, туку сега ми е омилената (дигитална) игра со карти. Koга надојде бранот од Hearthstone клоновите, пробав неколку, ама никогаш не ми текна дека можеби ќе дочекам и MTG во тој дух. Прејака е и тврдам дека е милион пати попаметна идеја од она прескапо лајно на Valve и Ричард Гарфилд наречено Artifact.

Нов MTG блок: Scars of Mirrodin

Scars of Mirrodin e Magic: The Gathering блок, составен од три едиции излегува на 1-ви октомври годинава, и заедно со Zendikar блокот и Magic 2011 (излегува летово) ќе го сочинуваат Standard форматот кој ќе се игра од есен, кога конечно Shards of Alara ќе ротира. Овој пат, Wizards of the Coast решиле да се вратат на постар свет, Mirrodin, кој беше претставен во истоимениот блок пред некои 5-6 години. Се израдував за ова, бидејќи токму Mirrodin беше блокот со кој почнав да играм Меџик.

Миродин е вештачки свет, создаден од метал. Секој од главните пет региони е претставен со посебна боја и населен од различни суштества. Бидејќи голем дел од светот е создаден од метал, артефактите имаа голема улога во играта, и за првпат се појавија Artifact Lands како карти, кои за жал исостанаа во Shards of Alara, каде што шардот Eспер беше многу сличен со Миродин. Во Mirrodin блокот, првпат се појави и Equipment како вид на карти, нешто што продолжи како стандарден дел од секоја едиција која што следеше.

Го сакам светот на Mirrodin, не само поради тоа што ми беше првиот контакт со играта, него имаше и одлична приказна која очекувам сега да се продолжи. Веќе има Planeswalker карти, па во Scars of Mirrodin верувам дека конечно ќе ги видиме ликовите од Миродин претставени преку нив. Од тогаш до сега, артефактите во Меџик еволуираа и нудат солидна игра и баш ќе ми биде мило да видам какви ќе бидат тука. Artifact лендовите мора да се вратат во некаква форма, а и нема да е лошо да ги репринтаат оргиналите.

Одличен потег на Wizards, пријатно сум изненаден што се решиле на вакво нешто. Дури и да им запнале идеите за нови светови, сосема сум океј со тоа, зошто има уште многу во тие што веќе ги знаеме, што можеби не е искористено до крај. Покрај тоа, враќањето на Magic: The Gathering во Миродин добар маркетиншки потег што може да врати многу фанови на Mirrodin блокот кои се откажале од играта. Се надевам дека следен свет за посетување ќе им биде Kamigawa.

MTG: Како Rise of the Eldrazi ќе ја измени играта?

Уште неколку недели до објавувањето на новата Magic: The Gathering едиција, Rise of the Eldrazi која ќе го комплетира Zendikar блокот.

Zendikar до сега се покажа како еден од најквалитетните блокови. Солидна приказна, добри карти и нови Planeswalker-и кои и не беа толку играни за разлика од оргиналните пет, но сепак си го најдоа местото во одредени декови. Zendikar ми ја врати вербата во играта после Shards of Alara блокот. И изгледаше совршено се додека не почнаа да се појавуваат спојлери од новите карти од Rise of the Eldrazi кои не ветуваат занимлива игра за останатите декови.

Што е со Rise of the Eldrazi? Главната тема на едицијата се новите безбојни Eldrazi суштества, огромни во секоја смисла, од mana cost до способностите кои ги имаат, како на пример Annihilator со кое противникот жртвува перманенти кога е нападнат колку што е бројката на Annihilator. Покрај тоа, имаат огромен (најчесто на 10) power/toughness и се тешки за бранење.

Бараат многу мана за да влезат во игра, што нема да преставува никаков проблем, бидејќи има други карти (земји, артефакти и сл.) кои го решаваат ова со тоа што за играње на Eldrazi карти даваат повеќе мана отколку за останатите. Па, така Eldrazi суштествата кои бараат, пример 12 мана, ќе може да се изиграат за многу помалку и да бидат спремни за напад уште во 6-ти круг. Немаше да биде толку досадно, доколку начинот на кој може да се изиграат Eldrazi картите беше малку потежок. Вака е прелесно, картите се неверојатно моќни, прават многу работи кои не се во полза на противникот, па претпоставувам дека дековите што ќе се играат по издавањето на едицијата ќе бидат само Eldrazi декови и декови кои ќе се прават за играње против нив.

Ова воопшто не е добро, бидејќи комплетно ја менува играта и ја цица целата забава. Таман кога мислев дека неможат полошо од Shards of Alara, се појави ова да ми докаже дека сепак можеле. Искрено за надевам дека превидувањава нема целосно да се исполнат и дека на турнири ќе може да видиме и друго освен Eldrazi декови...

Друга новина во Rise of the Eldrazi се карти што може да се левелираат. На секој круг откако ќе влезе суштество во игра, ќе може да се доплати додатна мана со што суштеството ќе добие левел плус, а со тоа и нови способности како flying, shroud, trample, итн. Ова е сосема нов начин на играње кој ја менува играта на подобро, но во никој случај не ги балансира срањата кои ги содржат Eldrazi картите.

До сега се познати и два нови Плејнсвокери, втората верзија на Sarkhan Vol, тука со нова боја и ново име - Sarkhan the Mad. Комплетно промашен Плејнсвокер, многу ограничен за играње, многу нетипично за овој вид на карта. Тука е и Gideon Jura, се појавува прв пат и прави поинтересни работи од Sarkhan the Mad, па мислам дека ќе си го најде местото во некој дек. Според Orb of Insight, ќе има уште еден, би требало да се појави спојлер деновиве.

За контрол дек како мојот, нема ништо интересно, освен Eldrazi картите и еден просечен Echo Mage кој прави нешто што е дел од стратегијата на контрол декови, меѓутоа помалку од доволно.

Светскиот пририлисот е закажан за 16-17 април. Rise of the Eldrazi ќе биде официјално во продажба една недела покасно.

Преглед на Rise of the Eldrazi

Rise of the Eldrazi е новата Magic: The Gathering едиција, која ќе го комплетира Zendikar блокот. За разлика од претходните едиции кои содржат помалку карти од првата во сетот, оваа ќе има вкупно 228 плус 20 basic land, што значи дека ќе може самостојно да фукнционира на constructed турнири, односно драфтови.

Датумот на излегување е 23-ти април. Веќе се познати неколку карти, како и обвивките за бустерите, а има и некои слики од карти кои сега за сега се непознати.

Kozilek, Butcher of Truth беше првата позната карта од оваа едиција и една од многуте Eldrazi видови на суштества кои ќе бидат застапени. Картите се безбојни, што значи дека би можеле да бидат корисни во разни декови. Kozilek искрено ми е некако претерена карта, осеќам дека повеќето нови декови ќе се базирани на ова. Мислам, прави толку многу работи што отвара безброј опции за играње. Ќе функционира и во Control декови како замена за други карти кои сега се користат за победа.

Пририлисот ќе биде една недела пред официјалното пуштање на Rise of the Eldrazi во продажба, се надевам ќе можеме и тука да играме тогаш. Периодов ќе има уште новости за едицијава, па ќе ги постирам.

Mono Blue Control

Деновиве го комплетирам првиот Mono Blue Control дек. Во мојата Маgic: The Gathering кариера, првпат играм нешто вакво и ми изгледа прилично интересно и свежо, бидејќи стратегијата и начинот на играње е многу поразличен од aggro дековите што сум ги играл до сега.

Значи, идејата е противникот да биде онеспособен за играње на карти кои мене би ми наштетиле, односно би го спречиле влегувањето на Sphinx of Jwar Isle. Картата е 5/5 суштество, кое лета и неможе да биде мета на спелови и други ствари што ги прават некои карти и не ми се баш добродојдени. Покрај клучнaта Sphinx of Jwar Isle, имам карти како Cancel, Negate, Unsummon и слични кои би го успориле противникот правејќи пат за Сфингата, и карти што ми помагаат да влечам или да си местам што ќе влечам (пример, Ponder). Гледав да потрошам што помалку пари за деков, па повеќе од пола карти веќе ги имав или ги мењав. А, баш поради тоа го немам Jace Beleren, а гледам дека комбинацијава функционира добро и без него.

Не успеав уште да го пробам на турнир, ми фалат уште неколку карти за sideboard и некои што прават исто како овие што веќе ги имам, само што бараат помалку мана. Ако деков се покаже добро на турнириве што следат, ништо чудно да го играм и на државно првенство за некој месец. За информација, светското годинава е повторно во Јапонија.

Имам спремено уште два дека (Naya и Mono White Kor Aggro) што се доволно компетитивни за турниско играње, само што периодов решив да се сконцентрирам само на овој.

Додека сум на темава, новата едиција, последна од Zendikar блокот, ќе се вика Rise of the Eldrazi и излегува во април годинава. Сеуште е рано за детали, ама се надевам на карти што ќе ми се најдат за деков. Ме мрзи да постирам целосна листа на карти, ќе пишам кога ќе ги присоберам и тие неколку што ми фалат.

Worldwake prerelease

Денес се одржа пририлисот на новата Magic: The Gathering едиција, Worldwake, со една недела задоцнување. Значи, 5 кола, 18 играчи, 4 саата играње, секој со дек склопен од три Worldwake бустери и три Zendikar, и ниеден Jace, the Mind Sculptor. Мене, како и обично, малер со новите карти, не ми се падна ништо што можев да го играм. Исто како на претходните пририлис турнири, само овојпат малку полошо. Морав да играм три бои, искомбинирани најдобро што можеше со тие карти, па само еднаш од пет пати ми се погоди декот како што треба. На крај, не ни можев да останам сконцентриран на играње.

Како и да е, убав помин во "Гоблин", немав учествувано на пририлис од летоска, добра пририлис карта - Comet Storm и куп карти на кои мора да им најдам место во некој дек. Супер е актуелниов блок, далеку подобар од шарениот Shards of Alara.

Следниот викенд ќе има два рилис турнири, во петок и во сабота. За повеќе информации на сајтот на "Гоблин".

Deadly Perils, Priceless Treasures...

Пројдоа точно пет години од мојот прв MTG дек. Правев пауза од летоска и деновиве спремам нов дек. Веќе разгледувам карти од Zendikar, M10 и тоа што веќе имам, за да склопам нешто ново и интересно за играње. Плус, нејќам да пропуштам ништо од Zendikar, блокот е најдобриот од Ravnica, па навака, барем од тоа што можев да видам. Во февруари излегува и втората едиција, Worldwake. Приказната за светот на Зендикар ја има на сајтот на Гоблин, нема да објаснувам многу, клик тука. Многу интересно и посериозно од приказните на Lorwyn/Shadowmoor и Shards of Alara блоковите.

Wizards конечно се спуштија на земја со боиве и има еднобојна едиција, далеку подобра од шарениот Shards of Alara сет. Кај што беше без врска, остави и дек (Jund) што едвај може да се победи, а гледам го играат премногу луѓе. А, немам намера да правам дек, специјално наменет да победи Jund.

Почнувам со декот неделава, моментално тестирам тоа што имам и што може да се игра, па ќе видиме. Има интересен дек со вампири, али се премногу скапи клучните карти...

Преглед на Magic 2010

По неколку месеци пауза, се враќам на Меџик. Пропуштив две едиции, државно првенство и куп други работи, но тоа е тоа, одиме понатаму. Magic 2010 е новата Core Set едиција, која е поразилична од претходните Core Set едиции, најпрво поради името (од сега ваквите едиции ќе бидат означени со годината која следува) и неколку измени во правилата (нема mana burn) и неколку измени во терминологијата ("into play" станува "battlefield"), што не е воопшто страшно, бидејќи Меџик играчите лесно се адаптираат на вакви ситни промени.

Мило ми е што има добри црвени карти, дури и Гоблини, па веројатно пак ќе можам да си ја играм омилената раса.

Magic 2010 содржи 249 карти, пола од претходните едиции, додека останатите се нови. За дел од картите клик тука. Поради технички проблеми, prerelease-oт и launch-от кај нас се одложени за следниот викенд, значи на 25-ти и 26-ти јули во "Гоблин". Кога веќе ги спомнав нив, имаат нов сајт полн со информации околу Меџик и други игри.

Во септември ќе излезе и нешто ново за играва, се вика Planechase, делува ептен интересно, па се надевам дека ќе може да се заигра и тука. Еве повеќе околу ова.

Добро што им текна...

Конечно ми стигна пакетот од Wizards of the Coast, со пластичната DCI картичка за која сум регистриран од јануари 2005! Доцнеше поради некои фрки со акаунтот, но добро што воопшто стигна.

Добив и неколку textless карти (стандардна испорака после одиграни пет официјални турнири) кои ќе ми бидат доста корисни плус една голема верзија на Spellbreaker Behemoth за украс. Во писмото пишува дека треба да има и Cryptic Command, ама изгледа заборавиле да стават. Како и да е, сега редовно ќе добивам вакви пакети.

За некој ден ќе биде и пририлисот на новата едиција, Alara Reborn, а најавени се две нови, Magic 2010 (за летово) и Zendikar (октомври). Ќе пишам повеќе за ова деновиве.

Преглед на Conflux

Викендов беше светскиот prerelease event на новата Magic: The Gathering едиција, Conflux, втората едиција од Shards of Alara блокот. Кај нас prerelease турнирнирот е одложен и ќе се одржи во недела, на 8-ми февруари. Ќе играм, со надеж дека ќе ги добијам двете карти (барем по една копија од двете) кои се единствените од едицијава што навистина би ми биле корисни.

Целиот Shards of Alara блок отиде предалеку со мешање на боите, па голем дел од новиве карти се со пет бои, а успеаа да направат и карта која иако потешко влегува во игра, е речиси невозможно да не ја добие партијата. Незнам кој е јунакот што стои зад Progentius, но успеа да создаде нешто што ќе го уништи духот на играта. Браво! Сега ќе имаме декови со Progenitus и декови со кои ќе се обидуваме да преживееме. Со ова, Conflux според мене е најлошата Magic: The Gathering едиција.

Настрана тоа, јас планирам да си направам моно-црвен дек со Banefire и Voracious Dragon, кои ги спомнав погоре. Двете карти одлично функционираат со Гоблини, така што ќе ми биде мило да продолжам да играм со оваа раса и понатаму. Единствено ми е страв од цената која би можеле да ја достигнат (се шпекулира дека Banefire ќе чини 15$). Како и да е, останатите карти ги имам, па ќе пробам да се скрпам некако.

План Б ми е досредување на Esper декот, ќе пробам да го прилагодам за турнири, зошто има неколку карти што би можеле да си го најдат местото кај мене. За повеќе, после prerelease-от.

2HG и Conflux спојлери

Само што се вратив од 2HG (Two-Headed Giant) турнир. За неупатените, тоа е формат на Magic: The Gathering каде што се игра во тимови, односно двајца на двајца. Првпат играв 2HG и сум тотално заљубен во форматов и се надевам дека Гоблин екипава ќе организира пак во брзо време. Со колегата игравме агресивни декови, goblin и rogue декови. Ја изгубивме само првата партија (од четири), поради моето лошо влечење на карти на почетокот. Како и да е, ова беше еден од најдобрите турнири на кои што сум учествувал.

На крајот на месецов, излегува и нова едиција, втора од Shards of Alara блокот, под името Conflux. Продолжение на приказната со нови карти, од кои ќе ми требаат само две (по четири од секоја) за да склопам нов, компетитивен goblin дек. Единствениот проблем е наоѓањето на тие карти, бидејќи ќе бидат rare и верувам дека и цената ќе им биде поголема. На сајтот на Wizards of the Coast веќе има visual spoiler и може да се погледне на овој линк.

Magic: The Gathering на Саем

На Новогодишниот панаѓур ќе има Magic: The Gathering дешавки, почнува овој петок и ќе трае до 29-ти декември. Веројатно најголемиот настан ќе биде квалификацискиот турнир за Grand Prix-от што ќе се одржи во Ротердам на почетокот на 2009. Подолу е мејлот што денес го добив од ГОБЛИН.

Почитувани,

Доста беше работа и учење! Време е да се опуштиме за новогодишните празници! А како подобро отколку со играње Magic!?
Затоа Ве покануваме од петок (19.12.) па се до понеделник (29.12.) на Новогодишниот панаѓур, каде Гоблин ќе има свој простор, во Халата 4 на Скопското сајмиште. (во прилог ви го праќаме целосниот распоред на турнирите на Саем)

Magic забавата почнува во недела, со првиот од низата Grand Prix Trial турнири од новата сезона.
Со победата на Финецот Анти Малин на Светското првенство во Мемфис беше спуштена завесата на сезоната 2008, а новата 2009 кај нас почнува со квалификациите за Grand Prix Rotterdam. Првиот Grand Prix турнир од 2009 ќе се игра со sealed deck, што значи дека и GP Trial-от во недела ќе биде со истиот формат.
Веќе е најавено учество на неколку играчи од Грција, па засукајте ги ракавите и да покажеме колку знаеме!

Журката продолжува во текот на целата предновогодишна недела. Најразлични друштвени и стратегиски игри ќе бидат отворени за ваша забава.
Не само што во секое време ќе можете да дојдете и бесплатно да ги играте сите игри и бесплатно да учествувате на Friday Night Magic турнирот, туку вашето присуство ќе биде и наградено! По еден бустер ќе добие секој што ќе дојде на Скопското сајмиште пет пати.

Повелете, ве очекуваме!

Големото финале на предновогодишната прослава ќе се случи во сабота (27.12) со неверојатен Giveaway турнир, на кој првопласираниот играч ќе добие два бустери + Eventide маица + Dual Deck holder + Ajani Vengeant promo + Demigod of Revenge promo!!! За сите останати има голем број награди (во attachment), а секој учесник ќе ја прослави Новата година баерм со по 2 бустери и Foil promo prerelease карта!

Среќна Нова
и првиот бустер во 2009 нека ви биде Mythic Rare,

Поздрав од Гоблин екипа

Ден на игри во "Култура"

На 02.11 во "Култура" на плоштад, ќе се одржи Ден на Игри. Екипава од "Гоблин" организира.

Битно, ќе има промоција на друштвени игри, ќе има промоција на Magic: The Gathering, плус турнир во 14:00, со интересни награди, читам еве на форумот на sezaigri.com. Ќе има и World of Warcraft турнир (картите) од 17:00. Таман завршувам со полагање петоков, идам обавезно на ова, башка не сум играл Меџик месец дена.

Почнува порано изгледа, зошто има турнир Yu-Gi-Oh! од 11:00. Како и да е, ќе трае цел ден, така да се гледаме таму.

Преглед на Shards of Alara

Деновиве конечно се појавија неколку карти што ќе ги содржи новата Magic: The Gathering едиција која го започнува и новиот блок (значи нова приказна и нови карти поделени на три едиции), Shards of Alara. Shards of Alara ќе има pre-release на 27-28 септември, а официјално излегува на 3-ти октомври.

Првиот дел од Shards of Alara ќе содржи 249 нови карти од кои 15 ќе бидат сосема нов вид, Mythic Rare. Исто така, ќе има и нови (претпоставувам 5) Plainswalker карти што првпат се појавија во Lorwyn. Дури и на pre-release ќе се дава Plainswalker. Има промена и во preconstructed дековите, веќе нема да бидат такви туку ќе одат како "Intro Pack", пакување од 41 карта + Booster pack во паковка со многу поинтересен дизајн, барем од колекционерски аспект. Едвај чекам да си земам вакво.

Што се однесува до мојот Goblin дек, од тие 10-тина спојлер карти на официјалниот сајт, само Goblin Assault картата делува корисно за мене. Деновиве ќе има уште, па ќе ги ставам и тука.

Државно првенство во Magic: The Gathering

Годинешното државно првенство (шестто по ред) во Magic: The Gathering ќе се одржи во недела, 7-ми септември во клубот "Retox". Оваа година нема никакви квалификации, отворено и може да учествува секој заинтересиран. Учеството е 700 денари, со што секој учесник добива три бустери (два Shadowmoor и еден Eventide) и пијачка од клубот. Почетокот е во 10:00 наутро, а пријавувањето е во тек. Не сум сигурен точно колку кола ќе се играат, ама веројатно не повеќе од шест. Ќе има два формата, standard и booster draft. Победникот добива 1000$ и покана за светското првенство во Мемфис во декември годинава.

Кога веќе почнав за MTG, официјалниот сајт деновиве е ре-дизајниран и изгледа многу подобро од порано. Во септември pre-release ќе има и новата едиција, Shards of Alara, од истоимениот нов блок. Деновиве на сајтот ќе има повеќе информации и спојлери за картите, па ќе пишам нешто повеќе тогаш. Битно, ќе биде огромно освежување за Magic: The Gathering, ќе има многу нови работи и едвај ја чекам.

Преглед на Eventide

По неколку месеци од изгледувањето на последната Magic: The Gathering едиција, крајов на месецов излегува вториот дел од Shadowmoor блокот, Eventide. Eventide се надоврзува на приказната од Shadowmoor, и конечно треба да ја заврши приказната започната со Lorwyn. Логично, темната тематика од Shadowmoor продолжува и тука и баш ме интересира дали ќе заврши со среќен крај враќајки на она што го знаеме како Lorwyn, идиличното и весело место каде што владее вечно лето. Од тоа што до сега го прочитав од Shadowmoor книгата, не ми делува баш така, ама останува да видиме.

Е, сега. Од аспект на гејмплеј, Shadowmoor не ме воодушеви којзнае колку. Да, има навистина добри карти, само ретко што успеа да се вклопи во гоблиниве кои ги играм, а и веројатно ќе продолжам и понатаму да ги играм. Комплетно ја сменив стратегијата на декот, ама уште не успеав да видам како се понаша на турнири против јаки декови. Овојпат, поголемиот дел од играта ми зависи од една карта и многу среќа за да ја извлечам додека партијата е во рана фаза.

Од картите што досега се појавија од Eventide, нема нешто што ќе биде корисно за тоа што го играм, ама затоа па има моќни карти за оние што играат Киткини или Елфови. Пририлис турнирот ќе се игра и тука, нa 13.07 и 20.07. За повеќе информации - тука.

Поклон

Стигна поклон од Wizards of the Coasts! Мала папка за Magic: The Gathering карти, собира повеќе од 100, со супер слика, башка foil (светка). Вакви поклони праќаат на регистрирани играчи, со DCI бројче. Отидов ја карти да редам...

Shadowmoor импресии

Денес беше и вториот prerelease турнир на Shadowmoor кај нас, како и release на глобално ниво. Малку ми е криво што не успеав да играм на првиот, ама и денес беше доста интересно, имаше доволно народ. Сега сфаќам дека кога малку повеќе ќе навлезеш во Magic: The Gathering, најинтересниот дел од целиот циркус се prerelease турнирите, нормално, поради новите карти. :)

И покрај лошите карти што ми се паднаа, сега додека ги средував дома, најдов нешто интересно, па врз основа на тоа ќе правам нов дек. Нема нешто што би одговарало за дековите што веќе ги имам. Можеби малку претерале со хибридните карти и мешањето на боите, па згора на тоа и новите способности на картите, ама ќе видиме како ќе биде. Денес беше само почетокот...

Чекам да стигне fatpack кај нас со книгата и одма купувам, зошто приказната во Shadowmoor владее.