April 19, 2012

Кој Молдер?

Кој би рекол дека Духовни ќе може да се ослободи од ФБИ агентот кој верува во вонземјани и паранормални појави преку ваков лик? Сериозно, мислев дека кариерата му е одамна завршена и баш поради тоа ја заобиколував Californication со години наназад. Моментот кога епизодите ќе почнеш да ги делкаш една по една, сезона по сезона, Молдер некако останува да ти бледее во детството заедно со ружната Скали. 


Хенк Муди е писател со неколку успешни новели зад него и филмска адаптација која ја мрази како што сите го мразиме Том Круз. Лошите одлуки на Хенк во минатото го имаат одвоено од неговата шанса за семејство, вечната муза и бивша девојка Карен и ќеркичата која се обидува да ја израсне. На почетокот на првата сезона, Хенк го запознаваме како лик кој е тотално осврнат кон хедонизам, пие, ужива разни дроги и ја проаѓа секоја девојка што ќе ја сретне низ Лос Анџелес. Скроз рокенрол лик, кој вози правливо црно Порше 911 кабриолет со скршен фар. Хенк живее на стара слава и нема напишано ниту една реченица со години.

Шармот и харизмата му се непроценливи, а и често се причина за непријатните ситуации во кои упорно завршува. Сепак, единствената желба му е да биде со семејстовто, без разлика што и да прави. А, прави многу, затоа што е шизик и му се може и сака.

Серијата е феноменално напишана, сите ликови можеш да ги засакаш, со сите нивни маани и доблести. Дури и Миа, причината за еден куп глупости што му го згорчуваа животот на Хенк, некако успева да се искупи. Californication има храброст да ги прикаже сите последици од погрешни потези, притоа кршејќи разни морални барикади и сепак да не потсети дека на крајот од денот, сè е поради неа. Имав сосема погрешна претстава за серијава, мислев дека е некој глуп ситком, а ме изненади со одличниот склоп на хумор, драма и секс до дупка, што би рекле комшиите од истокот.

Моментално ја гледам четвртата сезона, додека се симнува петта. И, мило ми е што ја почнав и ми испаднаа пет сезони за гледање во еден здив. Браво за Духовни, скроз се оттргнал од тајпкестот. 

А, и да. Задолжително да се обрне внимание на Чарли Ранкл. Тоа е еден опасен лик со сериозно лоша среќа на моменти. Баш таа негова баксузна ѕвезда успева да ме насмее до солзи и кашлање.

April 4, 2012

Заврши Spartacus, почна Game of Thrones

...а јас, каснам малку со муабетот. Викендов заврши втората сезона на Spartacus. Замислата ми беше пост во кој ќе се жалам како не ме бендиса новиот актер во улогата на Спартак(ус) и колку ми е криво за Енди Витфилд. Бидејќи во еден здив ги изледав и првата сезона и приквелот Gods of the Arena, имав проблем со замената во вторава сезона што ја фатив негде при крај. Лијам Мекентајр ми изгледаше како сосема друг лик, па едвај продолжив да гледам. После неколку епизоди, успеав да го навикнам. За среќа, и покрај малкуте ликови што останаа живи од првата сезона, серијата се држи до стилот и атмосферата. Отуството на Батијатус веќе не се ни приметува кога Глабер ќе дојде во фокус. 


Gods of the Arena е приквел од шест епизоди, додека продуцентите чекале да се подобри здравјето на Енди. Ганикус, како носечки лик тука, си обезбеди и место во втората сезона. Се осеќа дека продуцентите правеле многу за да се пополни дупката што ја остави Енди. Што со споредни ликови, што со приказна. Крајот на сезонава буквално ме разнесе. Лијам Мекентајр Е Спартакус и ќе ме има мене како публика и во следната сезона. Не е Енди, но докажа дека може да се носи со ликот и да ги води робовите кон ослободување. 

Серијата е супер. Пример за како може да се спакуваат помалку познати историски факти во епска приказна со крв, песок и цицки. Што вика Миле, шпанска серија за машки. 

Ја гледав и новата Game of Thrones. Каков почеток на сезона, а? Втората епизода веќе е "протечена", само што не стигнав уште да ја гледам. Првата беше таман, баш колку да ги постави темелите на она што ќе го гледаме сезонава. Џофри е уште жив и уште тероризира луѓе околу. Денерис со змејовите и остатокот од народот на Кал Дрого, се обидува да преживее низ некоја (очигледно) заебана пустелија, без храна и вода. Зимата уште не е почната, а веќе се осеќа дека работите нема да бидат убави за никого. Знам по некој спојлер за сезонава, за жал не по моја волја. 

HBO си се држат до квалитет, си имаат успешни серии и затоа не си сомневам во тоа што ќе направат со Game of Thrones. Чекаме нови епизоди.

April 3, 2012

Музиката од трејлерот на Prometheus

После новиот трејлер, убеден сум дека Prometheus е филмот за оваа година. Без разлика што очигледно приказната е многу слична на онаа од Alien, ова е филмот што со нетрпение го чекам. Она што е највпечатливо од трејлерот, освен суштеството што изгледа како втор братучед на Ксеноморфите, е музиката. Феноменално се вклопува во кадрите што може да се видат и го прави трејлерот подобар него што е. 


Саундтрекот на Prometheus го работи Марк Страјтенфелд, но не е автор на она парче од трејлерот. Музиката што може да се чуе во трејлерот е излезена од продукциската куќа audiomachine, која се занимава баш со создавање на музика за трејлери и рекламни кампањи. Тимот на audiomachine од 2006 до денес, во своето портфолио има огромна бројка на наслови на познати филмови и игри. Неверојатно е на што сè се имаат потпишано. Значи, луѓето снимаат музика која филмските продуценти може да ја лиценцираат за потребите на нивните трејлери. Така некако е и најдена "Judge & Jury" од компилацијата Deus Ex Machina. Со ситни измени е дојдено до она што може да се чуе во трејлерот на Prometheus. Еве ја таа верзија, на овој линк. Плус, таман е и за аларм сабајлечки.

Бонус трака, бонус трака 2.

Премиерата на Prometheus е на 8-ми јуни. Донесете го во кино кај нас, аман!