Никогаш ништо нема да успее да успори успешен хорор серијал. Без оглед на тоа во каков облик е еволуиран жанрот, секогаш некој ваков култен слешер наслов како Scream ќе се обиде да си обезбеди простор за ново продолжение. Се разбира, мотивот е претежно профитот кој го носи препознатливоста на брендот, ама барем Scream никогаш не се доживувал себеси премногу сериозно за резултатот да е нешто безобразно лошо како Halloween Kills. Баш тој лежерен мета-наратив му дозволувал на Scream да се извлече со некои работи кои не се толку функционални кај сличните вакви филмови.
Тоа "редефинирање" на слешер хорорите се случува многу ретко, па приликите да се остане свеж играјќи по веќе воспоставени правила се релативно ограничени. Петтиот Scream што излезе оваа година е сосема свесен за тоа, како што и секогаш биле филмовите во овој серијал, па затоа и лесно е да претпоставиш до кај ќе се спружи и што може да направи со себе. Ако премногу се дистанцира од сопствената формула веќе нема да биде Scream филм. Претежно намерно се придржува, некогаш е едноставно несмасен, ама пак успева да овозможи исклучително забавно искуство.
Главниот штос на Scream филмовите кој го озвоможува поголемиот дел од забавата е да погодиш кој е новиот маскиран убиец или убијци. Нема Џејсон, нема Мајкл Маерс, секогаш е некој нов од ликовите во кругот на главниот протагонист. Како што пишува на самиот постер за петтиот Scream - убиецот е на самиот постер. Само чекаш до крај да видиш дали ти се точни предвидувањата. Измеѓу, филмот те пренасочува и те подлажува, а во случајот на овој нов Scream, те шлапа со носталгија и повремено кршење на четвртиот ѕид со мета-референци.
Невозможно е петти пат да го правиш истото, а да не се позезаш на своја смета. За среќа, Scream во случајов тоа го прави многу културно и симпатично, без да те јаде туѓ срам како во случајот со The Matrix Resurrections. Отсекогаш и било така со Scream, со тоа што овој пат се пројдени повеќе од десет години од претходното продолжение, па филмот располага со нови начини да се референцира себе во жанровски контекст. Понекогаш настојува да биде и сериозен со критиките кон денешната "токсична публика", меѓутоа Scream филм никогаш не би можел да се снајде во таква насока баш поради сопствената мека природа и хуморот што мангупски умее да го протне. Доаѓа до некоја точка повремено, ама никогаш со доволно тежина да ја прејде и прецизно да поентира.
И, тоа е сосема океј, бидејќи филмот поуспешно функционира на други полиња. Најважното е што и покрај стандардните елементи, успева да биде забавен и тензичен Scream филм. Ниту еден Scream филм не успеал да го повтори хоророт од првиот, можеби не ни треба, ама пак има доволно за да биде повеќе од носталгична комедија која се референцира себе. Дури прави и некои храбри потези кои апсолутно не очекував дека ќе ги затекнам, па ете може да се каже дека има и едно смело скршнување од формулата што ми приреди фино изненадување.
Младата актерска екипа е супер, ликовите се интересни, харизматични и добро си играат меѓусебно. Иако се обичните тинејџери што треба да бидат искасапени во текот на филмот, нивната хемија е одлична и се многу повпечатливи од оние во Scream 4. Џек Квејд од The Boys серијата ми е можеби омилениот дел од филмот. Дечкото изгледа дека максимално се забавува со улогата и на моменти го товари цел филм на грб. Алал.
Како што е редот, тука се и старите оригинални ликови кои преживеаа четири продолженија, меѓутоа просторот е воглавно отстапен на новата генерација која ефикасно го користи како Сидни, Гејл и Дуи некогаш. Се надевам во следното продолжение кое почнува да се снима летово ќе видиме барем дел од новава екипа. Спремен сум дури и за мали отстапки од формулата, иако верувам дека би сркал и повеќе од истото. Забавни ми се сите Scream филмови, па нека дадат што ќе дадат.
Не очекував дека толку ќе ми биде кул петтиот Scream, искрено. Често пати оди на тенка жица, ама некако успева да се избалансира и да не се сруши. Вес Крејвен за жал го нема, меѓутоа луѓето зад овој филм добро го разбрале серијалот за да ги искористат неговите елементи без да ја оштетат суштината. Безбедно и функционално. Топла препорака ако си фан. Не измислува ништо ново, а постоечкото го послужува добро и уредно како и секогаш.
Види такоѓе:
No comments:
Post a Comment