Туѓ срам и тага

Баш вчера изгледав една убава видео ретроспектива на Warcraft III. Играта поради која буквално трчавме после школо накај дома и утредента прераскажувавме кој што направил и до кај стигнал. Неверојатно искуство. Не ни имавме саглам интернет по дома во тоа време за да се испотепаме меѓусебно. Ја преигрувавме кампањата и плескавме ботови. Тоа онлајн распуцавање дојде нешто покасно. После неколку години се појави World of Warcraft, па се испонавлековме и на тоа. Други заглавија и на оригиналната DotA, мод за Warcraft III од тој период.

Цело тоа Warcraft искуство беше така фино додека Близард не се трансформираа во Активижн Близард, па некако случајно или не, постепено љубовта за правење на квалитетни игри почна да спласнува. Види денес каде е оваа компанија што некогаш владееше со индустријата. Креативно пресушена, со секојдневни скандали за сексуално вознемирување, преправа и уништува стари култни наслови, ја препакува и продава истата игра по трет пат и  мисли дека тие што останале да им ги даваат парите ќе играат човеколики гуштери догодина.

Нема ни да коментирам за минатонеделната најава за Diablo Immortal и смешниот PC порт. Ќе почекаме до јуни да видиме колку јадно ќе биде тоа. Ја гледав денешната најава за мобилната Warcraft игра. Единственото добро е како до последен момент успеаа да ја држат во тајност. Разбирам дека пазарот за мобилни игри е исклучително лукративен и јасно ми дека Активижн Близард сакаат и од таму да мацнат. Тоа ми е сосема разбирливо. Но, во исто време имам нула доверба и многу ниски очекувања од оваа компанија, па бев спремен за вакво фијаско. Не можев да не го гледам ивентот. Како два слупани возови е, не можеш да тргнеш поглед.

Дури и самите ивенти им се тажни и трагични како новиве игри. Јасно им е дека публиката веќе не им е наклонета како некогаш, па ризик е да собереш толпа народ на нешто како BlizzCon овие денови. Публиката денес има многу повеќе причини од Diablo Immortal за да ги исвирка и посрамоти. Сега игрите ги најавуваат онлајн со неколку девелопери несреќници што мора да се кикотат и глумат возбуда седнати на маса со претходно научено сценарио. Од онакви помпезни спектакуларни најави за експанзии до двајца окезени дебилци што едвај чекаат да си одат дома да си го обноват линкдинот.

Стварно ли е толку популарно тоа Clash Royale што еве Активижн Близард после пет години вадат нивна верзија од истото? Од толку многу позабавни опции и прилика за иновација, со ова ли ќе им ги земаат парите на кинеските деца или кој и да ги игра овие игри? Еднаш веќе закаснија со MOBA игра, не очекував дека втор пат истото ќе го направат. Искрено, ќе бев донекаде задоволен со pet battle игра што е синхронизирана со тој Pokémon систем веќе присутен во World of Warcraft од Mists of Pandaria навака. 

 

Ова не знам што е, не ме ни интересира. Изгледа како секоја втора мобилна игра што ми се појавила како реклама. Можеби само презентацијата беше ужасно лоша, а можеби сум само премногу возрасен за жанров и играње игри на мобилен уред што не се Magic: The Gathering Arena. Се надевам дека Warcraft Arclight Rumble ќе си ја најде сопствената публика. Верувам дека постои, ама јас не можам да се видам заседнат во веце како кликам врз минијатурен Трал и неговите армии.

Тажно ми е да ги гледам Близард во оваа состојба. Особено кога вчера пак се потсетив на Warcraft III и колку добри игри правеа некогаш. Сум се крстел во нив, куќна слава ми е Илидан Стормрејџ. А, сега само низа разочарувања без надеж за опоравување. Еве, дури и Dragonflight да е стварно добра, пак треба претпазливо да пристапиш и да се помолиш дека oвојпат луѓе со здрав разум и стремеж за квалитетна игра ги направиле правилните одлуки. Јеби га.

Каков крш е Warcraft III: Reforged?

Колку сум среќен што пред некој ден ме мрзеше да станам по картицата за да направам приордер на Warcraft III: Reforged. Тоа се тие проблеми на белиот човек кои во овој случај ми заштедија 30 евра. Баш сакав да си ја поклонам за роденден. Reforged, ремастеризираната верзија на култните Reign of Chaos и The Frozen Throne е веќе два дена во оптег и реакциите од играчите се страшни поради ужасниот полу-функционален краен производ. Пред недела дена Blizzard се соочија со слични работи поради финалето на последниот Battle for Azeroth рејд и сериозно мислев дека Reforged е тоа што малку ќе ги искупи.

Јасно ми е дека ова денес не е ни отприлика компанијата со чии игри израснавме, ама веќе е смешно како упорно тонат безнадежно. Можеби ќе имав разбирање долку ова беше игра на инди компанија или некој нов наслов. Срамота е вака да промашиш игра стара дваесетина години. Reforged требаше да биде комплетно преправена верзија на Warcraft III. Нови синематици и видео секвенци, нови модели, нови анимации, обновена графика, редизајниран кориснички интерфејс, соодветно имплементирани опции за онлајн играње, порамнување на фоклорот со World of Warcraft онаму каде што малку издивергира изминативе години... 

Наместо тоа, испадна дека Reforged е само неоптимизирана крпеница преполна со багови од кои многу луѓе не ни можат да ја играат. Ги нема ветените преправени сцени што ги парадираа на BlizzCon, графичките подобрувања не се воопшто конзистентни, некои модели се нови, други изгледаат идентично како тие од 2002. Мултиплеерот е скршен и нестабилен, па дури ни оригиналните верзии на Warcraft III не функционираат нормално, а двете верзии требаше да се меѓусебно компатибилни. 

Проблемите се расеани и низ најситните детали и најфундаменталните функционалности. Во некои ситуации дури и во самиот чет се преклопувал текстот. На некои модели и единици им е сменет полот и скиновите, па играчите се сомневаат дека Blizzard си се спремаат и за продавање на скинови и слично за вистински пари. Извисена е и онаа посветена заедница што се токмеше тука да креира сопствени мапи и сценарија за играње, зашто според новата полиса целата нивна работа сега автоматски ќе припадне на Blizzard. Ова значи дека ако некој утре измодира следна DotA, Blizzard слободно може да му превземе трудот и да го монетизира без надомест за авторот.

Паралелно на ова, за само два дена има и бројни случаи каде што Blizzard одбива да ги рефундира парите на тие што не се задоволни со Reforged со разни глупави изговори. Многу од тие луѓе се спремаат и правно да си ги бараат парите назад зашто се осеќаат измамено и обвинуваат за лажно рекламирање. Презабавно е да ја следиш катастрофава ако не си им дал пари. /r/warcraft3 си пршти без престан овие денови, а корисничката оценка на metacritic во моментов е 1.4/10. Стварно не можам да се сетам кога последен пат сум видел толку низок рејтинг за било што. 

Мислам дека ни за Fallout 76 немаше волку драми. А, имаа долго време да го средат и исполираат ова. Огромна компанија се со многу, многу ресурси. Да, беше малку чудно што ја одложија и го минимализираа маркетингот последниве месеци, ама мислев дека работат на некои ситници, не знам. Катастрофа по катастрофа се Activision Blizzard. World of Warcraft Classic веројатно им успеа само зошто е истата игра од 2004 без некои значителни промени. Сѐ ново што фатија го усраа.

Повеќе ми е смешна целава драма отколку што ми е криво дека нема да играм освежена Warcraft III. Единствено жалам што упорно успевам да наседнам на глупостите што ги ветува оваа запалена дива депонија од компанија. Ама, барем сега не платив пари за да ја научам истата лекција пак. Сигурен сум дека ќе докрпат во следните месеци, можеби дури и ќе пуштат на некој попуст, ама веќе изгубија значителен дел од играчите кои верувам дека нема да се затрчаат назад. Мислам дека и јас сум еден од нив. 

Види такоѓе:

• Драмата со Diablo Immortal
• Утринско драмење за World of Warcraft: Shadowlands

Утринско лигавење за Warcraft III: Reforged

Ме запрепастува фактот што постои генерација гејмери која ја има прескокнато Warcraft III: Reign of Chaos и нејзината експанзија The Frozen Throne. Скоро возрасна генерација што клика DotA и World of Warcraft и никогаш немала контакт со оваа RTS култна класика. Уште побизарно ми е тоа што се поминати шестнаесет години од играта, а кристално јасно ги памтам деновите кога првпат ја инсталирав и чекав да ми заврши последниот школски час и да трчам дома да ја играм.

Еден од мотивите на Blizzard со кои сакаат да нè убедат дека Warcraft III: Reforged е повеќе од лесни брзи пари е баш тој, да се понудат раните приказни на ликовите и настаните кои многумина ги запознале преку World of Warcraft. А, кога си имаш работа со и повозрасна публика, поедноставно е да ја претвориш нивната носталгија во лукративен бизнис. Јас немам никаков проблем со ова. Ремастеризирана, исполирана и модернизирана верзија на Warcraft III која визуелно не отскокнува многу од оргиналот? Повелете, ова е бројот на мојата кредитна картичка, Blizzard. 

Warcraft III: Reforged ќе ја содржи основната Reign of Chaos заедно со The Frozen Throne експанзијата. Ќе биде достапна на Battle.net платформата и што е најјако, мултиплеерот ќе биде компатибилен и со оргиналната верзија на играта. Така што Warcraft III пуристите што уште не можат да се откачат од старата графика (која патем одлично се држи и денес, барем за мои стандарди) ќе можат да се млатат со играчи што ја поседуваат Reforged.

Од видеата што излегоа до сега може да се забележи дека играта изгледа одлично и комплетно е задржан духот и покрај тоа што моделите и мапите се значително освежени и наштелувани. Не е како другите "ремастеризации" на други слични класични RTS игри каде што освен резолуцијата, останатото изгледа потполно идентично. Blizzard дури и комплетно ги имаат преснимено сите синматици и гласови.

Веројатно никогаш нема да дочекаме Warcraft IV и тоа ми е јасно. Изговорот е дека приказна во Warcraft IV не може да коегзистира паралелно со постојаниот прогрес на World of Warcraft фолклорот, меѓутоа верувам дека ако некогаш се случи вистинска RTS ренесанса, Blizzard ќе се први со нов наслов. До тогаш ова ќе функционира за мене. И, онака повремено знам да седнам и да изиграм некој Warcraft III skirmish, па ова топло ќе го пречекам. 

Warcraft III никогаш не остаре за мене, ама би сакал да ја видам дотерана. Секако, ќе има и опција за модирање, па едвај чекам да видам што сè заедницата ќе успее да изгради врз енџинот. Играта веќе може да се нарача од официјалниот сајт на Blizzard. Уште нема точен датум кога ќе биде достапна, но се очекува до крајот на 2019. Некои видеа за крај:

Официјален Warcraft III: Reforged трејлер

Трејлер за The Culling кампањата

Гејмплеј трејлер

Како да: Warcraft III со 1920x1080 резолуција

Warcraft III: The Frozen Throne, барем верзијата што јас ја имам, нема опција за резолуција која одговара на мојот монитор. Најдов решение кое овозможи играта да изгледа подобро од било кога и решив да го споделам, во случај некој друг да има потреба од истото. Преку Registry Editor, резолуцијата може да се смени по желба на корисникот.

Претпоставувам нема потреба да објаснувам како се отвара Registry Editor, па тој чекор ќе го скокнам. Патеката е следнава:

HKEY_CURRENT_USER > Software > Blizzard Entertainment > Warcraft III > Video

Во reswidth се внесува вредност по желба, во мојот случај 1920. Се селектира decimal и OK. (скриншот) А, во resheight се внесува 1080, исто decimal и OK. (скриншот)

Warcraft III сега автоматски ќе стартува со подесената резолуција. Во видео опциите на самата игра, нема да биде понудена за избор, така што при промена од таму, пак ќе мора да се поминува низ истото.

Тоа е тоа, прилично е едноставно.

Warcraft III на Garena

Wacraft III: The Frozen Throne играм со години, а никогаш не сум играл на Garena, Battle.net или нешто слично. Играм онака, аматерски, во LAN или против компјутер. Денес инсталирав Garena, баш да видам како се игра Warcraft "професионално". Лесно се наоѓа друштво за играње, повеќе се игра тимски 2 на 2, 3 на 3, меѓутоа има и соби за еден на еден. Изиграв три партии, првата со рендом армија, ме даде со Undead, ме решија од двете страни за помалку од 10 минути, еден со Human армија, другиот со Demon Hunter. Колегата од тимот (некој копиљ од Полска) се исклучи додека ја рушеа мојата база, па дека имаше Night Elves пробав нешто да се спасувам, али џабе. Играат тука, не се заебаваат.

Втората партија си играв со Night Elves, мојата раса, 3 на 3 партија и тепавме. Се погодив со тип што играше Undead во тим, па лесно влеговме во база со Фрост Вирмови и Кимери. Најинтересно е 3 на 3, на поголеми мапи, да можеш одма да завземеш рудник и да се развиваш на раат. Третата партија онака, бев на лошо место на мапа, па го изедов прв. :)

Гледам има фори некои што не сум ги знаел. За градење на база, редослед на војска, херои... Така да, читање туторијали не помага, Garena бара само вежбање. Ќе видиме деновиве тоа.