Мини-серијата The Falcon and the Winter Soldier

Не ме интересираат филмскиве марвелувања после Avengers: Endgame. Тоа ми беше супер заокружување на таа децениска приказна и не сум нешто особено загреан да видам што е следно. Знам дека доаѓа цел бран на нови филмови и серии и сигурен сум дека повеќето ќе ги прескокнам. WandaVision ја рипнав. Ликовите ми се преглупи и немам некоја желба да се натерам да отседам десетина саати таму. На The Falcon and the Winter Soldier дадов шанса само поради Баки и љубовта кон мојот засекогаш омилен Marvel филм - Captain America: The Winter Soldier.

Не знаев што да очекувам од ова и ме затекна пријатно изненаден. Бев малку скептичен за како ќе се справам со мојата неодамна развиена алергија на Ентони Меки, ама ми остави океј впечаток воглавно. Не беше неподнослив како во очајната втората сезона на Altered Carbon или во епизодата од поеднакво лошата Black Mirror сезона. Не дека е лош човекот, меѓутоа кога ќе го извадиш од рамката на "спореден лик", некако се гуши. За среќа, во Falcon and the Winter Soldier, исклучително динамичната синергија со Себастијан Стен го воспоставува балансот што Ентони Меки може да го поткопа поради недостатокот на харизма која обично ја очекувам од главен лик.

Приказната во The Falcon and the Winter Soldier е сместена пола година после настаните во Avengers: Endgame и е многу покомпактна и баш соодветна за овие ликови. Дури и е во цврста стилистичка корелација со The Winter Soldier филмот, нешто што можеби и не би требало да биде изненадување, ама ете го земам како огромен бонус. Двајцата со соочени со мала армија супер-војници што се пукнале со тазе серум и се обидуваат да го вратат светот каков што бил во годините кога Танос одлучи да ја преполови популацијата. Интересен концепт, особено тоа што заканата е всушност варијанта на стриповскиот Flag-Smasher, само тука малку поинаку наштелуван и адаптиран. 

Паралелно на тоа, избран е и нов Капетан Америка, Џон Вокер, кој пак е стриповскиот U.S. Agent и имаме прилика да го видиме неговиот зачеток и трансформација. Мини-серијата не штеди на стриповската основа, па така што уфрла разни елементи од историјата на Кеп, а воведува и верзија на Ајзеа Бредли. Сигурен сум дека има уште многу други вакви ситници, ама за жал моето познавање на овој фолклор завршува отприлика тука некаде. Ако си поозбилно навлезен во стриповскиот Капетан Америка, верувам дека уживањето е уште поголемо кога ќе успееш да ги приметиш.

Интересно беше да се види кој како се справува со себе и тоа околу по настаните во целиот марвелов филмски арк. Ми се свиѓа како серијата пристапува кон Баки, неговата историја како Зимскиот Војник и цената што тој денес ја плаќа. Баки, заедно со Кеп, ми е еден од најтрагичните Marvel ликови и баш е прикладно кога добива третман со ваков посериозен тон. Штета што серијата некако брзо се ослободува од овој аспект на приказната. Можев цело време да го гледам Баки како се труди да се интегрира во свет комлетно различен од тој што му е нему познат.

The Falcon and the Winter Soldier има и значително големо количество на квалитетна акција. Никогаш нема да ми здосади да го гледам Баки како млати наоколу, а тука за среќа има многу од тоа. Уживав дури и во оние сцени кога нетренирани ликови нелогично успеваат да се додржат на вака обучена машина за елиминирање. Воглавно се забавував, па успевам да ги простам моментите на таквата неконзистентност. Она што не успевам целосно да го простам е тоа што форматот на серијата е можеби несоодветен за приказна која се труди да ја раскаже.

Шест епизоди ми се видоа како малку на почеток. Импактниот старт стварно ветува многу и се плашиш дека ќе те остави недојаден до крај. Се случуваат премногу добри работи за кои си мислиш дека ќе треба уште цела сезона за да се расчистат. За жал, серијата некако успева да спласне после онаа шокантна кулминација во четвртата епизода, па бавно се тегне уште саат и кусур во следните две. Ова комотно можеше да биде мејл. 

Мислев дека петтата епизода само зема здив пред некое поголемо финале, но не. Финалето е досадно. Баш се чудев што ќе прават до крај. Иако приказната ги затвора повеќето одврзани краеви и остава простор за иден развој, со времето што го потроши ми личеше како два пати да заврши. Можеби во филмски формат ќе беше далеку поефективно, којзнае. Ако скратиш саат време од сè што се случи после четвртата епизода и ја исечеш целата приказна со сестра му на Сем, ете ти филм што ќе пројде на стриминг сервис. Ова како намерно да влечеле да држиш претплата на Disney+ шест недели.

Сепак, ако уште те чеша за Marvel материјал, супер е. Настрана од развлечениот крај, остатокот е квалитетен и возбудлив. Се надевам дека набргу ќе ги видиме сите овие ликови пак. Џон Вокер е можеби најсветлата точка во The Falcon and the Winter Soldier покрај Баки и сигурен сум дека ќе видиме уште повеќе од него. Се крчка четврт дел во Captain America филмскиот серијал, па доколку не дочекаме некоја мини-серија измеѓу, веројатно тука е приликата каде што ќе може да опстои. Ама ете, не можам да не забележам дека ми пречи кога сè што гледам последниве години служи како вовед во нешто чија реализација е неизвесна. Што се случи со посамостојните приказни, каде отидоа? 

Види такоѓе: 

• Втората сезона на The Mandalorian
• Двете сезони на The Boys
• Хенри Кавил од Ривија
• Добредојде назад и збогум, Френк 
• Daredevil, најдобрата серија за 2015
  

Свршница

Единаесет години, дваесет и кусур долгометражни филмови. Сериите што се во истиот континуитет нема ни да ги бројам. Тоа е солидна бројка. Интересно ми е кога ќе го погледнам целово ова со перспективата што ми ја створи Avengers: Endgame. Не е дека не сум свесен за тоа дека последнава декада бевме соучесници во редефинирање на поп-култура. Само ете, начинот на кој таа се пакува и продава ми е исклучително фасцинантен, можеби затоа што не разбирам во целост што е тоа што им упали на Марвел, а не им успеа на другите.

Ми текнува еве на првиот Iron Man филм и периодот кога излезе. Го имам и "рецензирано" со две реченици, ама многу посимпатичен ми е серијалот муабетчиња со кои сум се "загревал" да го гледам. Ни на крај памет дека почнува ваков глобален културолошки феномен. Не можев да замислам дека ќе дочекам филмска адаптација на Civil War. Ни дека се создава франшиза што ќе израсне генерации, ни тоа дека возрасни луѓе ретроактивно ќе си додаваат суперхерои и стрипови како интерес во нивното минато, ко тоа хоби да симболизира којзнае каков социјален престиж. А, ни дека целото еден ден ќе успее ме презасити до гадење.

Епа, Марвел само што ја круниса оваа филмска етапа и ја заокружи сопствената ера на доминација со мејнстримот. После Avengers: Endgame нема ништо да биде исто - како во овој шаренолик фиктивен универзум, така и на реалниот пазар. Јас имав прилично турбулентно искуство со франшизата. Ја славев кога ми ги исполнуваше соновите за суперхеројска забава, ама и кренав раце кога осетив дека ме гуши. Магијата за мене престана да функционира со Age of Ultron и тогаш престанав активно да се следам што се случува. Тука некаде се сруши тој емотивен мост што го имав со овие ликови. Веќе ми беше сеедно.

Ликови како Стрејнџ и новиот Спајдермен ми беа супер, тоа беа и единствените Марвел филмови што ги гледав во кино после Ultron, ама не ми се губеше време со додворувачката расна и невештата родова "освестена" пропаганда што следуваше после тоа. Доволно Star Trek и Star Wars ме спамираа со тоа. Ги пропуштив последните Ент-мен, Гардијанс, Тор, како и Infinity War. Некои од овие ми извртеа дома позадински, а Infinity War успеав скоро да го повторам зашто сепак сакав да сум таму за Endgame. Сакав да се испратам со оваа екипа со која иако се разотидовме последниве години, имавме супер незаборавни моменти во помладите, поедноставни денови.

Avengers: Endgame има сè за да приреди една достојна проштална журка. Спектакуларна каша од емоции, нескриена носталгија, многу заебанции, по некоја солза, фина музика, пиво за дебели стомаци, мечти за иднината... Сите се целосно внесени и сите се забавуваат. Актерите, публиката, режисерите, сценаристите и сите што вложиле во ова. Марвел добро го познава занатот, па ваквата завршница воопшто не ме изненади. Да беше било која друга франшиза можеби ќе се посомневав. Стварно три саати проаѓаат како да си пукнал со прсти.

Доколку некогаш си бил дел од оваа филмска авантура и успеала некако да те допре, макар и со само еден наслов - Endgame веројатно го има начинот да чепне таму. Како за сам крај, изиграни се сите карти и потрошени се сите средства. Толку ми е мило што ненамерно си направив услуга и останав изолиран од секакви трејлери, муабети, шпекулации, очекувања, предвидувања, спојлери и општо од сè поврзано со овој филм. Освен тоа дека крши срца и рекорди не знаев ништо друго, па оставив спонтано да ме воодушеви. Како што и се случи.

Не можеш да си рамнодушен кога стриповски страници оживуваат пред тебе како никогаш претходно. Неколку пати се потсетив зашто воопшто сакам ваков вид на фикција. Филмов е како некоја награда што ти следува ако си го прател ова. Не знам јас колку ја заслужив, ама сум некако благо окезен што ја добив. 

Не знам ни каква е иднината на франшизата што се однесува до приказната, ама не ми е ни битно. Мислам дека правецот ќе треба да е драстично променет за евентуално некогаш пак да се постигне ефектот што го создава Endgame. А, Endgame допрва ќе се зацврстува како споменик на еден збир филмски искуства што обедини генерации во кино и бескрајни дискусии. Ефекетот е поголем и од Logan и било кој нов Star Wars филм. Фала Марвел што можев и јас малку да се повозам.

Глупостите на Marvel со Captain America

Дента кога DC го почнаа Rebirth, Marvel решија да се обидат да ја израмнат галамата на стрип публиката со тоа што Стив Роџерс го направија таен агент на Хидра. Според Ник Спенсер, сценаристот на овие триесетина смешни страници на Captain America: Steve Rogers #1, Кеп отсекогаш бил Хидра. Сите овие години. Тајно работел за нивната кауза и покрај тоа што ликот 75 години претставува нешто сосема спротивно. Истиот тој Кеп што во 1941 му има удрено бокс на Хитлер. Јас да сум духот на Џек Кирби (Евреин, патем) не би го оставил Спенсер око да склопи. Не зошто се занесува со историјата и идеологијата на ликот, туку зошто мислел дека баш ова е добра идеја. Не само него, цел Marvel има да осеќа паранормални активности.

Ваквите колосални промени на етаблирани ликови не се некој нов трик, се случувале отсекогаш. Функционираат кога умира Супермен, кога Бејн му ја крши кичмата на Бетмен, дури и Кеп кога умира. Издавачите секогаш наоѓаат начин да го вратат континуитетот во "нормала", да, сигурен сум дека истото ќе се случи и сега. Но, вакви промени треба да остават нешто што нема да изгледа како евтина сензационалистичка финта. Ова со Кеп е баш такво. Се крена цел интернет ко некој да им ги запалил старите Captain America стрипови. Не е онака си седиш еден ден, си читаш Кеп стрип и ти се распаѓа во раце зошто некој одлучил дека бил злобен нацист цело време. Само е ужасно глупаво.

Уште па Спенсер тврди дека ова не е клон, не е Роџерс со испран мозок, не е некоја сила што е одговорна за неговите акции, туку дека е навистина тој. Ајде важи, еј. За неколку месеци (или веќе во следниот број што секако нема да го читам) ќе има некое слично објаснување што ќе е уште полошо од овој "пресврт". Ја постигнаа целта, се зборува секаде за ова. Само не гледам зошто ваков потег, освен за создавање бука со цел да се наруши онаа на конкуренцијата. Продаваат подобро од DC зошто филмовите им се подобри од тие на DC. Не верувам дека имаат потреба од вакви срања за зголемување продажба и покрај тоа што стриповите последниве години им се тапа.

Затоа повеќе читам DC. Marvel се жива досада. Зевање. Особено онаа линија кога ги почнаа насловите од #1 со тоа Marvel NOW!. Последното забавно беше Infinity, можеби. Но, со оглед на тоа дека не се сеќавам на ништо што се случуваше таму, јасно е колку бил силен впечатокот. На други наслови не ни можам да се присетам. Само тековниот Daredevil на Чарлс Соул и Daredevil / Punisher ги следам. Тие се океј.

Саptain Аmеricа: Сivil War (2016)

Тоа што гледав филмска адаптација на Civil War ми е доказ дека никогаш не си престар за да веруваш во чуда. Скромната желба од пред осум години да ја видам приказната макар и како цртан филм денес е претворена во една реалност што се вика "најдобриот филм на Marvel Studios до сега". Идејата дивергира од хартијата каде што е родена, но е доволно испочитувана за Captain America: Civil War да функционира беспрекорно во контекст на медиумот, а и универзумот каде што егзистира. Битното е дека постои нова регулатива за костимираните душебрижници која не сите ја пречекуваат со восхит. Тоа е и причината за Кеп и Тони да се најдат на спротивните страни кои не се баш најрасположени разликите да ги решат со дијалог.

Верував дека Civil War ќе биде добар. Барем поради мојата вечна љубов кон стрипот. Она што не го очекував, е навидум доволно густата содржина да биде попрскана со детали кои ќе ја надополнат уште поелегантно, а притоа да изгледа природно и да ја одржи цврстината без да попушти по рабовите. Civil War е повеќе од Captain America филм. Во исто време е The Avengers, Iron Man и филм за сите оние херои кои не добија самостоен третман. Од десетина такви, има место за секого и филмот не изгледа воопшто присилено или пренатрупано. Вистинска мајсторија е да изманеврираш нешто вакво во два и пол часа без сопки. 

На наједноставен начин, Civil War го донесе Блек Пантер во Марвеловиот филмски универзум и го вклопи толку добро да се чувствуваш како отсекогаш да бил тука. Секако дека ќе добие самостоен филм, меѓутоа веќе неговата приказна и мотиви се доволно воспоставени за да биде дел од групното гушкање. Но, на веќе бесно залетаниот филм, дополнителната адреналинска инјекција доаѓа од Спајдермен. Кога повторно најавија Питер Паркер (трет во последниве десет години), зевав три дена од досада. Сега можам да се заколнам дека ова е најдобриот Спајдермен што се појавил на филм. Овие дваесетина минути овде се подобри од секоја негова претходна адаптација. 

Од друга страна, Вижн делумно отскокнува од "организираниот хаос" на Civil War. Не го сконтав во Age of Ultron, големи се шансите и да го преспав делот каде што го довлечкаа во филмот, а зошто не планирам да го гледам пак, ќе оставам да ме придобие со некое следно појавување. Ент-мен беше океј. За разлика од филмот. Очигледно некои од овие суперхерои подобро функционираат во мали количини, кога не се дел од самостоен филм. Ент-мен ми е од класата на Хокај и Фалкон. Како таков, одлично си го наоѓа сопственото место и тука. Отсуството на дел од Авенџерите речиси и да не се осеќа. Простор дефинитивно би имало и за нив, особено за Хулк, меѓутоа тоа е веќе финансиски предизвик. 

Civil War одлично го третира и акциониот дел. Пред сè, нели, ова е акционен филм. Уште во првата сцена со која почнува филмот веќе ти е јасно дека тој аспект е детално обработен. Брканиците, тепачките и општо целата кореграфија течат природно и реално, но доволно стриповски за сепак да го задржат духот на тоа што го гледаш. Ме држеа буден цело време, а тоа ми е особено битно. Според шаблонот, на крајот нели треба да има огромна акциона сцена со која кулминира филмот, па мило ми е што Civil War успеа да го заобиколи тоа. Или барем, да го протне посуптилно од претходно. 

Франшизата има иднина. Според новите играчи кои овој филм ги постави на теренот, изгледа солидно. Не знам колку имам снага за уште од ова, но ова малку ми ја врати довербата. Можеби нема да се нацртам прв во кино на Doctor Strange, ама затоа со задоволство би чекал четириесет минути во редица за пуканки за овој нов Спајдермен. Или Баки. Дајте му филм на Баки, прв сум кај и да треба.

Види такоѓе:

• Captain America: The First Avenger (2011)
• Captain America: The Winter Soldier (2014)
• Iron Man 3 (2013)
• The Avengers (2012)

Попладневна суперхеројска програма

Во последно време не пропуштам прилика да си ги испразнам цревата врз костимирани филмски протагонисти, a често некои ствари продолжуваат да плутаат откако ќе го ставам казанчето во функција. Тоа се моите двојни стандарди и контрадикторност. Радоста беше преголема со првиот Iron Man. Во истиот период Бетмен доживуваше рененсанса со филмовите на Нолан. Суперхероите ја напуштија хартијата стапнувајќи во територија која ги издржа толку добро, што додека се освестиш веќе се собрале сите Авенџери. 2012 беше добра година да си фан и да гледаш како се формира цела една субкултура.

Еден ден се будиш презаситен од суперхерои на филм и телевизија. Првите залаци биле добри, но сега имаш мачнина во стомакот, а тоа што ги гледаш буквално насекаде околу тебе не помага да се чувствуваш подобро. Секако, некогаш ќе се погоди некој специјален деликатес како Daredevil, но пак од рафтовите некое бајато срање те гледа директно во очи. Квантитетот наспроти квалитетот и општата неиновативност ти ја менуваат малку перцепцијата. Тоа што можеш да го игнорираш - го игнорираш, останатото го консумираш претпазливо. И, си викам, во ова ли ми се претвори забавата? 

Трендот за среќа умира полека, барем мене така ми изгледа. Достигнати се повеќе критични точки. За некоја година ќе биде заменет со нешто друго, а суперхеројските маички на повеќето ќе завршат како пижами и крпа за бришење прозори. Затоа се вика тренд и не, нема да е тука да остане. Веројатно годините ќе го исфилтрираат квалитетот, па нема да биде чудно ако во иднина кога ќе се гледа на оваа кинематографска фаза и ќе се возвишува трилогијата на Нолан, Ant-Man ќе служи за потсмев. 

Ми текна една работа откако ги изгледав првите епизоди од втората сезона на Daredevil. Во таа моја нарушена перцепција за целиот овој циркуз, се протна еден очигледен детал. Оваа година ги вкрстува суперхероите еден против друг. Во моментот кога го видов Панишер како пука во Дердевил и тоа се случува на медиум што не е стрип, ми кликна нешто што мислев дека одамна ми поминало низ системот. Се присетив на сите причини поради кои сакам суперхерои и како влијаеле на мене од моментот кога првпат го гледав Batman на Тим Бартон.

Му се спремам на Captain America: Civil War поради некаква носталгија и љубов кон стрипот, а не приметувам што навистина се случува. Еволуција на жанрот! Браво, Бобо! И, изгледа примамливо. Какво и да испадне дека е, пак е излегување надвор од шаблоните. Ако ова е последната станица на суперхеројскиот воз, нека замине со борба. Нека си разменат удари Бетмен и Супермен, нека му се накурчи Тони на Кеп. Зар не е тоа што ти ги дразнеше брадавиците кога беше хартија? 

Секако, нема слепо да го занемарам квалитетот, но очекувањата ми се поинакви и сум првпат после долго време возбуден за да го одморам цинизмот за сметка на ете, еден детски жар. Ќе ја оставам Вондер Воман на страна, ќе гледам да го игнорирам кастингот за Лутор и ќе се обидам да се забавувам како пред дваесетина години кога Бетмен и Супермен играчките ми беа за играње, а не во кутија на полица.

Сivil Wаr на Марк Милар

Кога пред седум години првпат читав Civil War најоптимистичката желба ми беше да ја видам приказната во некаква анимирана адаптација. Ни на крај памет дека суперхеројскиот тренд ќе земе таков замав после години и дека конечно ќе дочекам филмска варијанта на мојот омилен Marvel ивент. Трејлерот за Captain America: Civil War е тука, и иако различен од она што е на хартија, изгледа како да се поклопува со суштината и идеите на Марк Милар. Стрипот е пообемен, таму се сите популарни тимови и херои, а за жал Marvel Studios ги имаат филмските права за само дел од нив. Но, некако сакам да верувам дека ова сепак ќе е тој дефинитивниот филм, што ќе удри печат на сè што правеа последниве години. На крајот, доволно сум пристрасен да уживам во еден од последните суперхеројски филмови за кои ми остана ќеф да ги изгледам. 

Немав време за да ги поминам сите стотина броеви кои ја надополнуваат Civil War приказната, па ги пројдов само главните неколку. Искуството не е исто без деталите околку, меѓутоа содржината е сосема доволна да го покрие примарното - војната која избива помеѓу оние кои се обидуваат да го одржат редот, криејќи ги своите идентитети со маска. Откако аматерска позерска група суперхерои ќе проба да го превземе законот во свои раце ловејќи негативци кои се преголем залак за нивните способности, се случува инцидент со стотици недолжни жртви по што јавноста бара официјално регулирање на суперхероите. Старк смета дека ова е логичен чекор во насоката на функционирање, но Кеп ја брани тезата дека тоа би било напад врз нивниот интегритет и слобода. Актот за регистрација поминува и сите оние кои одбиваат да се приклучат завршуваат на спротивната страна на законот. 

Бруталната војна ги вкрстува групите кои ги предводат Кеп и Старк, наведувајќи ја публиката да одбере страна за која ќе навива, но реално не постои вистински избор бидејќи Милар има еднаков третман за двете. Двајцата се во право и се обидуваат да го одбранат тоа до крај, а сепак сивата теоријата некогаш е невозможно да ја забележиш. Додека играат "кој прв ќе попушти", има жртви и од двете страни. По тие седум броеви, кои претежно се сконцентрирани на самата војна, па приказната се одвива брзо и тензично, има уште една голема жртва која ако добро разбрав ќе ја видиме и во филмот. Не може таква војна без последици, а според филмскиот план на Marvel сосема има смисла. Но, да не се расфрлам со спојлери. 

Civil War е феноменален. Ако имаш време одбери и други наслови од ивентот (не мора сите, има некои што не се толку интересни) освен главниот, и фрли се на читање. Вистинско уживање е да видиш како изгледаат Авенџерс, Икс-Мен, Фантастик Фор и Панишер кога се закрвени. Се надевам дека не е предоцна Панишер и Дердевил да имаат мало камео во филмот доколку дозволи приказната, зошто и онака се дел од тој универзум. Не барам затвор во Негативната Зона, тоа сигурно нема да се случи, но една сцена со нив би била совршена.

Види такоѓе:

• Daredevil на Френк Милер
• Вовед во Deadpool

Avengers: Age of Ultron (2015)

Првпат после долго време да отидам на ваков филм со минимални очекувања и скоро без никаква возбуда. Веќе имам некаква мачнина од суперхерои во ваква филмска форма до степен да ми е сеедно. Затоа и пристапот кон Age of Ultron си го сметам за прилично објективен. Пристраноста некако ми ја снема. Да, забавен е, создаден по проверена формула која му го овозможува тоа. Било кој ќе отседи два саати, и дедо ти и внук ти. Функционираше повеќе пати до сега, па не гледам овојпат како би било различно. Прашањето е до кога суперхеројските филмови ќе се водечките блокбастери, и дали бројот на публиката ќе успее да биде вака голем додека Marvel си го остваруваат планот до 2040-та?

Мене ми е веќе заморно. Прво беше онаа прекрасна фаза кога ги создаваа хероите на филм, па се радуваш на Ајрон Мен, па чекаш со години за нов херој, продолжение. Па во еден момент си горд што, не знам, Тор е богот мејнстримот, наместо нешто што не би го допрел ни со стап од далеку. Додека ете, не ти дојде точката на презаситеност. Ништо нема да го повтори првиот пат кога се собраа дел од овие на сликата горе на едно место. Не го ни барав тоа. Ама, не најдов ни нешто што малку ќе ми го одвлече вниманието од спектакуларните Мајкл Беј експлозии и долги хаотични акциони сцени. Ни финтата со Хокај не запали. Единствениот што не доби посебен филм, ниту некаков асален третман претходниот пат. Џос Видон пробува да надомести за тоа, ама делува крајно исфорсирано ако умот ти е подесен да не ти биде многу гајле. Блек Видоу добива(ше) нешто поелегантен развој на ликот.

Кога сме кај форсирање, што беше со хуморот? Океј беа неколку фори, се насмеавме сите, ама после тоа? И, не само тоа. Туку наместо филмот да се обидува да биде иновативен, исполнува желби и поплаки на фановите. Буквално ги гушка и гали ситничарењата на публиката, со оправдувања за тоа кај им се девојките на Тор и Тони, до "моќите" на Хокај и неговата улога во тимот, притоа создавајќи уште еден куп такви "дупки" чие постоење не секогаш е предизвикано од некаква приказна. Јасно ни е Marvel дека Натали Портман е поскапа од Коби Смолдерс. Нема потреба од такви мрзливи објаснувања за каде е ликот.

Пред да помислиш дека само што комплетно се помочав врз твојот нов омилен филм, еве ќе ги разгледаме деловите што беа интересни. Не доволни за да го пуштам пак во следниве триесет години, ама барем ме одржаа буден. Почетокот беше супер. Борбата во Соковија со трупите на Стракер, сцената кога ќе се обидуваат да го кренат чеканот на Тор, тизот со Ваканда, Хулкбастер оклопот.. Првата акциона сцена и Хулбастерот (или "Вероника") ми беа единствените подносливи од тој тип.

Captain America: Civil War е последното што го чекам со некаков ќеф. После тоа, сајонара...

Скокање кон заклучоци: Agent Carter

Мислев дека хиперпродукцијата на суперхеројски и стриповски измет го удри вентилаторот со Gotham. Marvel веќе молзат сè што можат, DC се обидуваат да нè убедат дека Arrow тотално не е за тинејџерки, дека нивните филмови во следните 20 години ќе бидат мрачни, реални и сурови. Во оваа општа калакурница каде што секаков шунд се обидува да ти се пикне во секој отвор на телото, од далеку ти мавта агентката Картер. Marvel решиле да ја понудат и нејзе, зошто милионите одговорни за рејтингот на Agents of S.H.I.E.L.D. се фатени за раце во транс со пена на устата и чекаат уште. Уште од просечниот разреден ејакулат што ќе го прифатат само затоа што тоа е возот на кој се сите качени, еј. 

Шеширот е океј. Сериозно ми се свиѓа. Посакувам и јас да имав ист.

Со евтини референци кон Captain America: The First Avenger, обиди за noir, најклишеизираното сценарио во Сончевиот систем и експлоатација на Хејли Атвел, Agent Carter успева да биде полошо од првите неколку епизоди од Gotham и S.H.I.E.L.D. заедно. Пилотот го изгасив во моментот кога ликовите (кои се како излезени од досаден цртан филм, полудимензионални) станаа неподносливи со глумата и репликите. Кон кого го упатува Marvel овој стомачен грч? Недоволно еманципирани латентни феминистки? 40 годишни невработени осамени дркаџии што живеат со родителите и собираат аниме фигури? Како е можно после толку квалитетни стрипови и неколку веќе култни филмови да се обидуваш да протнеш нешто вакво? Кој ќе го гледа ова срање?

Пеги Картер беше супер во Captain America. Веројатно најинтересниот женски лик што го дополнуваше главениот херој од сите Авенџери. Нејзината појава беше баш онака јаготката на шлагот (аааа, ради шеширот јаготка, а брат аааа? Хехе...), а тука е во толку огромна количина што протекува од секаде. Некои поспоредни ликови не функционираат кога ќе им дадеш толку големо внимание и третман. Гледај како е уништен Колсон после неколку епизоди. Овде уште од самиот почеток вештачки се обидуваат да ја продлабочат, а се вртат околу неколку очигледни точки кои се доволни само еднаш да бидат спомнати. Океј, тажна е за Кеп, нема војна за водење, храбра е, но светот доминиран од мажи се обидува да ја спречи да полета. Баш трогателно. Дали ти девојко веќе почна да се идентификуваш со оваа самостојна жена-херој со влакнести тестиси? 

Јеби га, Marvel. Филмовите ќе ги следам додека не ми прекурчат, ама ова со серииве е дното. Такво е ко турско-бугарска сапуница, новелизација на филм или игра, Коелјо. Ми иде очите да си ги искорнам.

Captain America: The Winter Soldier (2014)

Marvel со Iron Man 3 покажаа дека се доволно храбри да истражуваат малку помрачни територии со нивните шарени суперхерои. Иако на поразличен начин, The Winter Soldier го фрла Кеп токму таму, во сомнителни конспиративни политички игри, кои ќе остават длабока трага во филмскиот универзум на франшизата. Кога имаш ваков лик, кој е исто така малку надвор од своето време, ова некако се чини како логичен тек. На кратко, ова е Captain America филмот кој јас сакав да го видам. Можни се ситни спојлери надолу.

Приказната е позајмена од феноменален стрип арк на Ед Брубејкер, една од заслужните за да се навлечам на овој лик. Marvel, за филмовите, се служат со најдобрите модерни приказни и одлично умеат да ги пренесат. Иако адаптацијата не оди во најситните детали, суштината е  задржана.

Додека Кеп се обидува да се прилагоди во дешениот свет во кој се затекна после десетици години, заканата доаѓа од редовите на S.H.I.E.L.D. Никој не е безбеден, па дури ни Ник Фјури. За денот додатно да биде сјебан, Кеп е соочен и со неговиот непрежален другар од Втората светска војна, Баки Барнс, по чија наводна смрт е претворен во брутален убиец со испран мозок и механички екстремитети, програмиран да елиминира секакви цели. Целата параноична ситуација која може засекогаш да го оштети светот како што го знаеме, станува и лична борба на Кеп со неговото минато и порив за исправање на истото.

Без разлика колку и да се сериозни темите со кои се занимава Captain America: The Winter Soldier, сржата на филмот е стриповска. Со тоа е постигнат балансот помеѓу двата света (нашиот и оној на Marvel), кој го прави ова остварување да биде толку моќно. Секако, намигнувањата кон слични настани од нашата денешница се присутни, но свиени на ваков начин, делуваат уште посимпатично. Она што Marvel успешно го прават со Captain America, се акционите сцени кои изгледаат како директно да се излезени од хартијата. Мило ми е што го продолжија тоа од првиот дел. Па, и самиот крај на филмот, каде што најчесто сме бомбардирани со безобразни ефекти и експлозии, е некако умерен и фин. Не само што е културно, туку и на моменти делува реално и убедливо. 

Кастингот е погоден како и секогаш. Покрај добро познатите ликови кои се филмови наназад дел од екосистемот, Captain America: The Winter Soldier нуди нови кои одлично се вклопуваат. Сосема заборавив на Falcon, кој ќе е дел од следните The Avengers. Ентони Меки не ми е нешто посебно познат, меѓутоа веќе го прифатив заедно со неговата приказна. А, на мое големо изненадување, се појави и еден актер од Heartbreak High, серија која веројатно денес егзистира во две телевизиски архиви, од кои едната е наша и за жал, веќе непостоечка.

Captain America: The Winter Soldier повторно ја помести границата. Ова веќе го зборувам за секој филм на Marvel и почнав да си здосадувам. Веќе не можам да го видам крајот на темпото, што е доказ дека тие луѓе таму многу добро знаат што прават. Со малку среќа и малку логика, гласините дека третото продолжение на The Avengers ќе се занимава со Civil War, би станале реалност. Останува да почекаме и да се надеваме.

Мала дискусија за Captain America: The Winter Soldier

На само неколку недели од премиерата на Thor: The Dark World, Марвел го пуштија трејлерот за Captain America: The Winter Soldier. Продолжението на The First Avenger, го носи ликот во втората фаза од филмскиот поход на Марвел, која започна пролетва со Iron Man 3. Како што покажало досегашното искуство со Марвеловиот филмски универзум, продолженијата секогаш биле барем едно ниво над првиот во низата. Можеби вториот Iron Man ќе повлече дебата околу ова правило, меѓутоа ќе го оставам ова за некој следен пат. 

Потегот на Марвел да одат со Winter Soldier како негативец, го дочекав со восхит. После The Avengers, баш ова е тоа што е потребно на ликот и приказната. А, кој е Winter Soldier? Баки, помошникот на Кеп во Втората светска војна и негов најдобар пријател. Откако ќе настрада на должност и ќе ја загуби раката и памтењето, Русите го наоѓаат смрзнатото тело и го реанимираат, претварајќи го во платеник со кодно име Winter Soldier. Една од најдобрите приказни на Ед Брубејкер и дел од причините поради кои почнав да читам Captain America стрипови. Филмот не можеше да има подобра идеја од ова, со оглед на тоа што ликот е сега во денешно време. Одлична можност Кеп да се истестира и на психолошко бојно поле, како што делумно беше случај и со Тони Старк во Iron Man 3. 

Captain America: The Winter Soldier се најавува како политички трилер, со избежна акција и експлозии, се разбира. Од овие две минути, eдно е сигурно, дека ова ќе биде најсериозната инкарнација на ликот на филм. Имаше два филма шанса да созрее, па не ни очекувам помалку. Крис Еванс сјае како Капетан Америка. Уште ми е чудно како им успеа на Марвел да го претворат во ова што е.

Трејлерот го најавува и Фалкон, Авенџерот го недостасуваше во оргиналната филмска постава, а ќе биде дел и од Age of Ultron. Captain America: The Winter Soldier доаѓа дури на пролет следната година, на 4-ти април.

Анимиран суперхеројски фикс: Avengers Assemble

Годинава Disney XD ја замени популарната The Avengers: Earth's Mightiest Heroes со нова анимирана серија со наслов Avenger's Assemble. До сега излегоа осум епизоди од првата сезона и по кратка пауза последниве недели, серијата продолжува со прикажување од 15 септември. Причината за нова серија е едноставна. Marvel сака анимирана серија која ќе биде поблиска до филмот. Овие Авенџерс се истите од филмот, појачани со задолжителен црнец (покрај Ник Фјури), Фалкон. За жал, Avengers Assemble моментално добива лош третман од фановите, особено оние заколнатите во оргиналната серија. Донекаде хејтот е оправдан, ама не можам целосно да се сложам, зошто EMH никогаш не догледав. Новата е многу подетска, тоа го потврдувам.

Иако не е најдобрата анимирана серија на светот, доволна е за неделен фикс во ваков формат. Секогаш има простор за подобрување, а како што читав, следуваат и поинтересни негативци сезонава. Приказните се просечни, можат да поминат кај секоја слична серија со било кои ликови. Кога ги гледаш по ред, не обрнуваш внимание на лошите моменти, а тие секако ги има. Можеби во овие осум епизоди повеќе од што треба.

Ликовите ги знаеме сите. Последниве години се толку популарни и препознатливи што не е тешко да ги продаваш на млада публика. Меѓутоа, тој што е задолжен за пишување на серијава, очигледно мисли дека децата ги распознаваат ликовите по облеката и боите. Како резултат на овие, има ситуации каде само и по тоа се разликуваат. Ова е можеби најслабиот дел од Avengers Assemble, а е многу, многу битен. Без разлика на таргет групата, срамота е такво мрзливо пишување. Патем, вакви серии не гледаат само мали деца, туку и големи деца. Тие големи деца ќе ти ја посерат серијата на интернет. Тоа и го прават. Не знам дали на Marvel им се исплати да вложуваат во нешто што евентуално ќе згасне поради лоши рејтинзи. И, онака само бројот на гледачите ги занима. Зошто да немаме асална Авенџерс серија? Нешто што ќе биде повеќе од "океј е, онака"?

Анимацијата им е супер. Гласовите се погодени кај сите освен кај Тони Старк. Не го барам Роберт Дауни Џуниор и таа ненадминлива харизма, ама типов тука е на погрешно место. Старк треба да има поавторитетен глас, не да звучи ко копиљ што им носи пица у Stark Tower. Друга замерка ми е тоа што Хулк е постојано Хулк. До сега не се сеќавам дека го видов Брус Банер некаде. Баш тоа ќе ги мрдне стварите што ги спомнував горе. Малку развој на ликови, бре. Не е 18 минути пукање и бркање ко првата сезона The Clone Wars, ама може и повеќе од ова.

Ќе дадам шанса уште некоја епизода. Секогаш може да ги сменам со Earth's Mighties Heroes. Она новото со Хулк изгледа е почнато. Не знам какво е, некако сомнително ми делува...

П.С. Agents of S.H.I.E.L.D. премиера  за две недели!

Што после The Avengers?

Прашината што ја крена The Avengers сеуште е некако присутна. Во меѓувреме, и вестите за следните проекти на Marvel не сопираат. The Avengers не само што ја зацврсти основата на идните филмови, туку постави и нови граници, како за ликовите, така и за оние кои се одговорни за нивното пресликување на филмското платно (кое годинава за среќа е дел и од загушливи кино сали во вукојебини како што сме ние). Што доаѓа наскоро?

Iron Man 3 адаптира приказна која исторски гледно, го префрла ликот во модерно време, нудејќи освежена историја и потекло на оклопот на Тони Старк. Extremis (на Ворен Елис) ќе послужи како основа за третиот дел, каде што конечно ќе го видиме и неговиот најголем душман, Мандарин (Бен Кингсли, браво за изборот). Сабајлево го читав Extremis, приказната е одлична. Настаните некако соодветно би се надоврзале на тоа што досега го видовме во преходните два, со логичен прогрес на ликот и експанзијата на универзумот во кој е сместен. Технолошкиот скок напред на самиот Iron Man, значи и ниво погоре за предизвиците со кои и The Avengers би можеле да се соочат. Iron Man 3 доаѓа следната година, во мај.

Thor 2 почнува со снимање следниот месец, а премиерата е закажана за ноември 2013. За разлика од Captain America 2, изборот за режисер е некако поуверлив и сигурен. Алан Тејлор зад себе има огромен број на епизоди од серии со звучни имиња меѓу кои и Game of Thrones. Изборот дали е поради маркетинг, не е битно, битно е дека имаат човек кој може уште подобро да го пренесе Азгард.

Captain America 2 ги добива браќата Русо (Community) како режисери. Иако изборот е некако чуден, мислам дека воопшто нема никаков простор за сомнеж, зошто сценаристите се истите од првиот дел. Она што му треба на филмот е издржана приказна. Со The Avengers го 'проодеа' во денешно време, сега треба да го видиме како трча и дига лошотии на клоци, сам. Уште нема сериозни информации за приказната, а и има време, зошто филмот излегува за две години.

Продолжението на The Avengers е исто така неизбежно. Или после оваа тројка, или пред Captain America 2, во мај.

Види такоѓе:

• Години на Суперхерои

Captain America: The First Avenger (2011)

Captain America: The First Avenger пристигна и кај нас, на зачудувачки квалитетна кино-снимка, неколку дена откако излезе во вистинските кина низ светот. Ќе го прескокнам кукањето околу немање кино-сали кај нас и ќе зборам за тоа колку е добар филмот, со по некој неизбежен спојлер...

Marvel полека ги комплетираше филмовите кои ќе кулминираат со The Avengers следната година. Последното пред "главниот" филм е токму Captain America. Филмот за чудо успеа да ги исполни очекувањата, нудејќи одлична забава која трае речиси два часа. Супер е како адаптација, верен е на стрипот и има сериозно добар кастинг. Крис Еванс комплетно го доловува ликот на Стив Роџерс, Хуго Вивинг е одличен Red Skull, а Хејли Атвел е актерка на која дефинитивно ќе и обрнам поголемо внимание во иднина. Томи Ли Џонс е цар, за него нема потреба од дискусија. А, од тоа што го знам за Баки, помошникот на Cap, Себастијан Стен е баш таман погоден за улогата. Се појавува и татко му на Тони Старк, тука млад, Хауард Старк.

По краткиот вовед, каде што Captain America е најден замрзнат по вода, филмот почнува во период за време на Втората светска војна каде што Стив Роџерс е одбиен како доброволец бидејќи не ги исполнува потребните здравствени и физички услови. Како огромен патриот и упорно копиле, Роџерс успева да го најде своето место во тајната програма на армијата која се обидува да создаде "супер-војници" по пат на сомнителни експерименти. Се здобива со неприродно голема физичка сила и станува нели, Captain America. Пред да почне да го фрла штитот кон нацистичките свињи, Роџерс прво служи како забава за американската армија, меѓутоа неговата желба за војување за татковината и пожртвуваноста за соборците, го носат на една многу повисока позиција. Проследено со феноменални сцени, тоа ми беше омилениот дел од филмот.

Топ режија и куп стриповски кадри, можам комотно да кажам дека ова е најдобриот филм на Marvel заедно со Iron Man. Костимот што го носи е супер дизајниран, а го има и дури и стариот, од раните стрипови. Камео улоги имаат нормално Стен Ли и Семјуел Факин' Џексон како Ник Фјури. Единствениот проблем што го имам со филмот е тоа што некако пребрзо ми заврши. И не би било лошо, покрај The Avengers, во иднина да видиме уште некој Captain America филм.

Обавезно ќе се гледа пак, макар и на кино-снимка (видов дека се појавила уште подобра верзија) зошто ќе пројде време додека излезе официјално нешто квалитетно. Инаку, на крај од филмот (во ова јас што го гледав го немаше), има тизер за The Avengers. Најавата ја има на овој линк. И, браво за потегот да ги соберат истите актери во истите улоги (освен Едвард Нортон) во еден ваков проект. Thor уште не го гледав.

Најава за Captain America: The First Avenger

Имам некое чувство дека Captain America: The First Avenger ќе биде филмот за оваа година. Судејќи по постерите, сликите што се вртат по интернетов и тизер трејлерот кој беше прикажан на Super Bowl-от, верувам дека ќе гледаме добар филм.

Крис Еванс делуваше крајно сомнително како Стив Роџерс/Капетан Америка, меѓутоа од ова што досега до видов, и не е така лош избор, напротив. Дечкото некако се вклопи во улогава и ми ги тргна сите негативни мисли што ги имав за кастингот. Покрај него, улогите ги толкуваат Томи Ли Џонс и Хуго Вивинг како Ред Скал, главниот негативец во филмот и главниот непријател на Капетан Америка. Дејствието ќе се одвива за време на WWII, па тоа може да пројде како уште еден индикатор за интересна адаптација. Marvel покажаа дека можат да понудат квалитетен филм базиран на нивни херој уште со првиот Iron Man, така што не се сомневам ни во ова.

Време е да се пролиста уште некој стрип како загревање за филмов. Captain America: The First Avenger ќе ја има премиерата во јуни оваа година.

Види такоѓе:

• Marvel: Civil War

По Civil War

Иако се трудев поспоро да читам, да ми биде уживањето подолго, не не можев. Заразен е стрипов и се чита брзо. Значи, посебните седум броја на Civil War, десетина Civil War: Frontline и еден куп броеви на Fantastic Four, The Amazing Spider-Man, New Avengers, Wolverine и слично каде што се надополнува приказната и е раскажана од аспект на хероите.

Убав серијал, супер напишан и нацртан со интересна приказна. Сега ми е криво што не го следев како што излегуваше пред година, година и пол. Се случија работи за кои не ми се веруваше дека некогаш ќе ги видам во стриповиве. Многу промени и многу приказни завземаа различен тек. Крајот беше најдобар и сосема неочекуван. Ми се чита и понатаму, барем да видам со Спајдермен што се случува после војнава, бидејќи на него многу му влијаеа настаните.

Ама, сакам прво да дочитам Ultimate Spider-Man и The Punisher Volume 5, па за натаму ќе видам. Имам уште некои интересни серијали на Marvel, како на пример Marvel Zombies, одамна го имам и никако да седнам и да го прочитам.

Значи, како што кажав, Civil War тотално владее. Би било супер ако некогаш го преточат ова во цртана мини-серија, под услов да се држат до стрипот, а не да биде некоја омекната варијанта за деца. Верувам дека еден куп фанови би сакале да видат Civil War цртан.

Доколку некој е заинтересиран за стриповиве во електронска верзија (скенирани, одличен квалитет), клик тука за торент. Собрани сите на куп, 106 броја вкупно.