Не ме интересираат филмскиве марвелувања после Avengers: Endgame. Тоа ми беше супер заокружување на таа децениска приказна и не сум нешто особено загреан да видам што е следно. Знам дека доаѓа цел бран на нови филмови и серии и сигурен сум дека повеќето ќе ги прескокнам. WandaVision ја рипнав. Ликовите ми се преглупи и немам некоја желба да се натерам да отседам десетина саати таму. На The Falcon and the Winter Soldier дадов шанса само поради Баки и љубовта кон мојот засекогаш омилен Marvel филм - Captain America: The Winter Soldier.
Не знаев што да очекувам од ова и ме затекна пријатно изненаден. Бев малку скептичен за како ќе се справам со мојата неодамна развиена алергија на Ентони Меки, ама ми остави океј впечаток воглавно. Не беше неподнослив како во очајната втората сезона на Altered Carbon или во епизодата од поеднакво лошата Black Mirror сезона. Не дека е лош човекот, меѓутоа кога ќе го извадиш од рамката на "спореден лик", некако се гуши. За среќа, во Falcon and the Winter Soldier, исклучително динамичната синергија со Себастијан Стен го воспоставува балансот што Ентони Меки може да го поткопа поради недостатокот на харизма која обично ја очекувам од главен лик.
Приказната во The Falcon and the Winter Soldier е сместена пола година после настаните во Avengers: Endgame и е многу покомпактна и баш соодветна за овие ликови. Дури и е во цврста стилистичка корелација со The Winter Soldier филмот, нешто што можеби и не би требало да биде изненадување, ама ете го земам како огромен бонус. Двајцата со соочени со мала армија супер-војници што се пукнале со тазе серум и се обидуваат да го вратат светот каков што бил во годините кога Танос одлучи да ја преполови популацијата. Интересен концепт, особено тоа што заканата е всушност варијанта на стриповскиот Flag-Smasher, само тука малку поинаку наштелуван и адаптиран.
Паралелно на тоа, избран е и нов Капетан Америка, Џон Вокер, кој пак е стриповскиот U.S. Agent и имаме прилика да го видиме неговиот зачеток и трансформација. Мини-серијата не штеди на стриповската основа, па така што уфрла разни елементи од историјата на Кеп, а воведува и верзија на Ајзеа Бредли. Сигурен сум дека има уште многу други вакви ситници, ама за жал моето познавање на овој фолклор завршува отприлика тука некаде. Ако си поозбилно навлезен во стриповскиот Капетан Америка, верувам дека уживањето е уште поголемо кога ќе успееш да ги приметиш.
Интересно беше да се види кој како се справува со себе и тоа околу по настаните во целиот марвелов филмски арк. Ми се свиѓа како серијата пристапува кон Баки, неговата историја како Зимскиот Војник и цената што тој денес ја плаќа. Баки, заедно со Кеп, ми е еден од најтрагичните Marvel ликови и баш е прикладно кога добива третман со ваков посериозен тон. Штета што серијата некако брзо се ослободува од овој аспект на приказната. Можев цело време да го гледам Баки како се труди да се интегрира во свет комлетно различен од тој што му е нему познат.
The Falcon and the Winter Soldier има и значително големо количество на квалитетна акција. Никогаш нема да ми здосади да го гледам Баки како млати наоколу, а тука за среќа има многу од тоа. Уживав дури и во оние сцени кога нетренирани ликови нелогично успеваат да се додржат на вака обучена машина за елиминирање. Воглавно се забавував, па успевам да ги простам моментите на таквата неконзистентност. Она што не успевам целосно да го простам е тоа што форматот на серијата е можеби несоодветен за приказна која се труди да ја раскаже.
Шест епизоди ми се видоа како малку на почеток. Импактниот старт стварно ветува многу и се плашиш дека ќе те остави недојаден до крај. Се случуваат премногу добри работи за кои си мислиш дека ќе треба уште цела сезона за да се расчистат. За жал, серијата некако успева да спласне после онаа шокантна кулминација во четвртата епизода, па бавно се тегне уште саат и кусур во следните две. Ова комотно можеше да биде мејл.
Мислев дека петтата епизода само зема здив пред некое поголемо финале, но не. Финалето е досадно. Баш се чудев што ќе прават до крај. Иако приказната ги затвора повеќето одврзани краеви и остава простор за иден развој, со времето што го потроши ми личеше како два пати да заврши. Можеби во филмски формат ќе беше далеку поефективно, којзнае. Ако скратиш саат време од сè што се случи после четвртата епизода и ја исечеш целата приказна со сестра му на Сем, ете ти филм што ќе пројде на стриминг сервис. Ова како намерно да влечеле да држиш претплата на Disney+ шест недели.
Сепак, ако уште те чеша за Marvel материјал, супер е. Настрана од развлечениот крај, остатокот е квалитетен и возбудлив. Се надевам дека набргу ќе ги видиме сите овие ликови пак. Џон Вокер е можеби најсветлата точка во The Falcon and the Winter Soldier покрај Баки и сигурен сум дека ќе видиме уште повеќе од него. Се крчка четврт дел во Captain America филмскиот серијал, па доколку не дочекаме некоја мини-серија измеѓу, веројатно тука е приликата каде што ќе може да опстои. Ама ете, не можам да не забележам дека ми пречи кога сè што гледам последниве години служи како вовед во нешто чија реализација е неизвесна. Што се случи со посамостојните приказни, каде отидоа?
Види такоѓе:
No comments:
Post a Comment