Свршница

Единаесет години, дваесет и кусур долгометражни филмови. Сериите што се во истиот континуитет нема ни да ги бројам. Тоа е солидна бројка. Интересно ми е кога ќе го погледнам целово ова со перспективата што ми ја створи Avengers: Endgame. Не е дека не сум свесен за тоа дека последнава декада бевме соучесници во редефинирање на поп-култура. Само ете, начинот на кој таа се пакува и продава ми е исклучително фасцинантен, можеби затоа што не разбирам во целост што е тоа што им упали на Марвел, а не им успеа на другите.

Ми текнува еве на првиот Iron Man филм и периодот кога излезе. Го имам и "рецензирано" со две реченици, ама многу посимпатичен ми е серијалот муабетчиња со кои сум се "загревал" да го гледам. Ни на крај памет дека почнува ваков глобален културолошки феномен. Не можев да замислам дека ќе дочекам филмска адаптација на Civil War. Ни дека се создава франшиза што ќе израсне генерации, ни тоа дека возрасни луѓе ретроактивно ќе си додаваат суперхерои и стрипови како интерес во нивното минато, ко тоа хоби да симболизира којзнае каков социјален престиж. А, ни дека целото еден ден ќе успее ме презасити до гадење.

Епа, Марвел само што ја круниса оваа филмска етапа и ја заокружи сопствената ера на доминација со мејнстримот. После Avengers: Endgame нема ништо да биде исто - како во овој шаренолик фиктивен универзум, така и на реалниот пазар. Јас имав прилично турбулентно искуство со франшизата. Ја славев кога ми ги исполнуваше соновите за суперхеројска забава, ама и кренав раце кога осетив дека ме гуши. Магијата за мене престана да функционира со Age of Ultron и тогаш престанав активно да се следам што се случува. Тука некаде се сруши тој емотивен мост што го имав со овие ликови. Веќе ми беше сеедно.

Ликови како Стрејнџ и новиот Спајдермен ми беа супер, тоа беа и единствените Марвел филмови што ги гледав во кино после Ultron, ама не ми се губеше време со додворувачката расна и невештата родова "освестена" пропаганда што следуваше после тоа. Доволно Star Trek и Star Wars ме спамираа со тоа. Ги пропуштив последните Ент-мен, Гардијанс, Тор, како и Infinity War. Некои од овие ми извртеа дома позадински, а Infinity War успеав скоро да го повторам зашто сепак сакав да сум таму за Endgame. Сакав да се испратам со оваа екипа со која иако се разотидовме последниве години, имавме супер незаборавни моменти во помладите, поедноставни денови.

Avengers: Endgame има сè за да приреди една достојна проштална журка. Спектакуларна каша од емоции, нескриена носталгија, многу заебанции, по некоја солза, фина музика, пиво за дебели стомаци, мечти за иднината... Сите се целосно внесени и сите се забавуваат. Актерите, публиката, режисерите, сценаристите и сите што вложиле во ова. Марвел добро го познава занатот, па ваквата завршница воопшто не ме изненади. Да беше било која друга франшиза можеби ќе се посомневав. Стварно три саати проаѓаат како да си пукнал со прсти.

Доколку некогаш си бил дел од оваа филмска авантура и успеала некако да те допре, макар и со само еден наслов - Endgame веројатно го има начинот да чепне таму. Како за сам крај, изиграни се сите карти и потрошени се сите средства. Толку ми е мило што ненамерно си направив услуга и останав изолиран од секакви трејлери, муабети, шпекулации, очекувања, предвидувања, спојлери и општо од сè поврзано со овој филм. Освен тоа дека крши срца и рекорди не знаев ништо друго, па оставив спонтано да ме воодушеви. Како што и се случи.

Не можеш да си рамнодушен кога стриповски страници оживуваат пред тебе како никогаш претходно. Неколку пати се потсетив зашто воопшто сакам ваков вид на фикција. Филмов е како некоја награда што ти следува ако си го прател ова. Не знам јас колку ја заслужив, ама сум некако благо окезен што ја добив. 

Не знам ни каква е иднината на франшизата што се однесува до приказната, ама не ми е ни битно. Мислам дека правецот ќе треба да е драстично променет за евентуално некогаш пак да се постигне ефектот што го создава Endgame. А, Endgame допрва ќе се зацврстува како споменик на еден збир филмски искуства што обедини генерации во кино и бескрајни дискусии. Ефекетот е поголем и од Logan и било кој нов Star Wars филм. Фала Марвел што можев и јас малку да се повозам.

Саptain Аmеricа: Сivil War (2016)

Тоа што гледав филмска адаптација на Civil War ми е доказ дека никогаш не си престар за да веруваш во чуда. Скромната желба од пред осум години да ја видам приказната макар и како цртан филм денес е претворена во една реалност што се вика "најдобриот филм на Marvel Studios до сега". Идејата дивергира од хартијата каде што е родена, но е доволно испочитувана за Captain America: Civil War да функционира беспрекорно во контекст на медиумот, а и универзумот каде што егзистира. Битното е дека постои нова регулатива за костимираните душебрижници која не сите ја пречекуваат со восхит. Тоа е и причината за Кеп и Тони да се најдат на спротивните страни кои не се баш најрасположени разликите да ги решат со дијалог.

Верував дека Civil War ќе биде добар. Барем поради мојата вечна љубов кон стрипот. Она што не го очекував, е навидум доволно густата содржина да биде попрскана со детали кои ќе ја надополнат уште поелегантно, а притоа да изгледа природно и да ја одржи цврстината без да попушти по рабовите. Civil War е повеќе од Captain America филм. Во исто време е The Avengers, Iron Man и филм за сите оние херои кои не добија самостоен третман. Од десетина такви, има место за секого и филмот не изгледа воопшто присилено или пренатрупано. Вистинска мајсторија е да изманеврираш нешто вакво во два и пол часа без сопки. 

На наједноставен начин, Civil War го донесе Блек Пантер во Марвеловиот филмски универзум и го вклопи толку добро да се чувствуваш како отсекогаш да бил тука. Секако дека ќе добие самостоен филм, меѓутоа веќе неговата приказна и мотиви се доволно воспоставени за да биде дел од групното гушкање. Но, на веќе бесно залетаниот филм, дополнителната адреналинска инјекција доаѓа од Спајдермен. Кога повторно најавија Питер Паркер (трет во последниве десет години), зевав три дена од досада. Сега можам да се заколнам дека ова е најдобриот Спајдермен што се појавил на филм. Овие дваесетина минути овде се подобри од секоја негова претходна адаптација. 

Од друга страна, Вижн делумно отскокнува од "организираниот хаос" на Civil War. Не го сконтав во Age of Ultron, големи се шансите и да го преспав делот каде што го довлечкаа во филмот, а зошто не планирам да го гледам пак, ќе оставам да ме придобие со некое следно појавување. Ент-мен беше океј. За разлика од филмот. Очигледно некои од овие суперхерои подобро функционираат во мали количини, кога не се дел од самостоен филм. Ент-мен ми е од класата на Хокај и Фалкон. Како таков, одлично си го наоѓа сопственото место и тука. Отсуството на дел од Авенџерите речиси и да не се осеќа. Простор дефинитивно би имало и за нив, особено за Хулк, меѓутоа тоа е веќе финансиски предизвик. 

Civil War одлично го третира и акциониот дел. Пред сè, нели, ова е акционен филм. Уште во првата сцена со која почнува филмот веќе ти е јасно дека тој аспект е детално обработен. Брканиците, тепачките и општо целата кореграфија течат природно и реално, но доволно стриповски за сепак да го задржат духот на тоа што го гледаш. Ме држеа буден цело време, а тоа ми е особено битно. Според шаблонот, на крајот нели треба да има огромна акциона сцена со која кулминира филмот, па мило ми е што Civil War успеа да го заобиколи тоа. Или барем, да го протне посуптилно од претходно. 

Франшизата има иднина. Според новите играчи кои овој филм ги постави на теренот, изгледа солидно. Не знам колку имам снага за уште од ова, но ова малку ми ја врати довербата. Можеби нема да се нацртам прв во кино на Doctor Strange, ама затоа со задоволство би чекал четириесет минути во редица за пуканки за овој нов Спајдермен. Или Баки. Дајте му филм на Баки, прв сум кај и да треба.

Види такоѓе:

• Captain America: The First Avenger (2011)
• Captain America: The Winter Soldier (2014)
• Iron Man 3 (2013)
• The Avengers (2012)

Avengers: Age of Ultron (2015)

Првпат после долго време да отидам на ваков филм со минимални очекувања и скоро без никаква возбуда. Веќе имам некаква мачнина од суперхерои во ваква филмска форма до степен да ми е сеедно. Затоа и пристапот кон Age of Ultron си го сметам за прилично објективен. Пристраноста некако ми ја снема. Да, забавен е, создаден по проверена формула која му го овозможува тоа. Било кој ќе отседи два саати, и дедо ти и внук ти. Функционираше повеќе пати до сега, па не гледам овојпат како би било различно. Прашањето е до кога суперхеројските филмови ќе се водечките блокбастери, и дали бројот на публиката ќе успее да биде вака голем додека Marvel си го остваруваат планот до 2040-та?

Мене ми е веќе заморно. Прво беше онаа прекрасна фаза кога ги создаваа хероите на филм, па се радуваш на Ајрон Мен, па чекаш со години за нов херој, продолжение. Па во еден момент си горд што, не знам, Тор е богот мејнстримот, наместо нешто што не би го допрел ни со стап од далеку. Додека ете, не ти дојде точката на презаситеност. Ништо нема да го повтори првиот пат кога се собраа дел од овие на сликата горе на едно место. Не го ни барав тоа. Ама, не најдов ни нешто што малку ќе ми го одвлече вниманието од спектакуларните Мајкл Беј експлозии и долги хаотични акциони сцени. Ни финтата со Хокај не запали. Единствениот што не доби посебен филм, ниту некаков асален третман претходниот пат. Џос Видон пробува да надомести за тоа, ама делува крајно исфорсирано ако умот ти е подесен да не ти биде многу гајле. Блек Видоу добива(ше) нешто поелегантен развој на ликот.

Кога сме кај форсирање, што беше со хуморот? Океј беа неколку фори, се насмеавме сите, ама после тоа? И, не само тоа. Туку наместо филмот да се обидува да биде иновативен, исполнува желби и поплаки на фановите. Буквално ги гушка и гали ситничарењата на публиката, со оправдувања за тоа кај им се девојките на Тор и Тони, до "моќите" на Хокај и неговата улога во тимот, притоа создавајќи уште еден куп такви "дупки" чие постоење не секогаш е предизвикано од некаква приказна. Јасно ни е Marvel дека Натали Портман е поскапа од Коби Смолдерс. Нема потреба од такви мрзливи објаснувања за каде е ликот.

Пред да помислиш дека само што комплетно се помочав врз твојот нов омилен филм, еве ќе ги разгледаме деловите што беа интересни. Не доволни за да го пуштам пак во следниве триесет години, ама барем ме одржаа буден. Почетокот беше супер. Борбата во Соковија со трупите на Стракер, сцената кога ќе се обидуваат да го кренат чеканот на Тор, тизот со Ваканда, Хулкбастер оклопот.. Првата акциона сцена и Хулбастерот (или "Вероника") ми беа единствените подносливи од тој тип.

Captain America: Civil War е последното што го чекам со некаков ќеф. После тоа, сајонара...

Загревање за Guardians of the Galaxy анимираната серија

Guardians of the Galaxy, во поставата од филмот, наскоро доаѓаат на телевизија, во анимирана варијанта. Сосема логичен потег, со оглед на тоа колку брзо ја освоија и нашава планета, а до летоска пошироката публика не ни знаеше кој е Грут. Додека е уште вруќо, Marvel знаат што може да направи нивниот најмлад коњ на кој така внимателно му ја чешлаа гривата. Новата серија изгледа нема да има поврзаност со филмскиот Marvel универзум, туку ќе функционира во склоп на анимираниот, иако читав некои муабети дека приказната ќе биде сместена измеѓу два филмови. Тоа е најмалку битно, затоа што ликовите би можеле феноменално да функционираат во ваков анимиран сетинг. Деновиве, како што се најавуваше кастингот, изгледав неколку од нивните гостински појавувања во тековните анимирани серии нa Marvel. Фино едночасновно загревање, иако далеку од нивниот вистински потенцијал. Верувам дека ликовите посилно ќе блеснат кога ќе се главни на своите дваесет минути.

Avengers Assemble: "Guardians and Space Knights" (S01E22 / Април, 2014)

Верзијата на Чуварите во Avengers Assemble е веројатно најблиска до нивната филмска инкарнација. Или мене перцепцијата ми е нарушена поради тоа што останатите ликови ми се добро познати и има некаква фина синергија. Двата тимови, се соочени со Галактус во битка и приказна чија примитивна основа прикажана тука би можела одлично да функционира и како филмот од соништата. Нема промашување кога ќе вкрстиш две групи кои засебно знаат често да се дисфункционални, барем до моментот кога ќе се одлучат дека силата им лежи во меѓусебната соработка. Одлична епизода, со фин пресврт на крај, наспроти онаква генеричка нарација за ваков тип цртани. Старлорд и екипата баш вечерва се спојуваат пак со Авенџерс, така што додека ја пишувам реченицава контам дека можеби подранувам еден ден со постов.

Ultimate Spider-Man: "Guardians of the Galaxy" (S02E18 / Јули 2013)

Не знам зошто толку хејт по интернетов за Ultimate Spider-Man. Или мене ми се погоди оваа епизода, и покрај тоа што домаќинот не им дозволи на Чуварите да му го украдат светлото. Епизодата е една година пред филмот, кога уште не мантраа сите "I Am Groot" во занес и со превртени очи, така што веројатно е разбирливо кој и зошто беше главен тука. Малиот тиз сепак некако си го наоѓа местото низ "пајажините", и без разлика на тоа што не се многу впечатливи, целата епизода ми беше крајно забавна. Дури се мислам да дадам шанса на серијата зошто ми изгледа ко да знае да си игра со Марвеловиот универзум.

Hulk and the Agents of S.M.A.S.H.: "Guardians of the Galaxy" (S02E04, Ноември 2014)

Ова ми беше првиот контакт со серијата, и веројатно ќе биде последниот. Идејата за тим Хулкови звучи сомнително уште на прв поглед, ама не очекував дека реализацијата е толку лоша. Барем во оваа една епизода. Серијата е концепирана како реално шоу чија поента е да го прикаже Хулк како херој, а не како чудовиште и демек роботски камери постојано го следат S.M.A.S.H. тимот. Чуварите се појавуваат втор пат во серијата со оваа епизода, која ја избрав пред претходната, бидејќи тоа беше некој арк од неколку епизоди што некако немав желба да го гледам. Ова е првото нивно појавување после филмот. Гостувањето ќе беше интересно, доколку гама-зрачењето од главните ликови не им го правеше престојот непријатен. Ако ептен сакаш да ги видиш Guardians of the Galaxy анимирани, тогаш океј, ама на сопствен ризик. Пол Дини инаку стои зад ова. Ебеш логика.

Пилотот на Agents of S.H.I.E.L.D.

Додека сè уште е вруќо од The Avengers, Marvel распалија кај стигнат. ММО игра, анимирани серии, нови стрип серијали... Доброто е што секаде држат одредено ниво на квалитет. Ништо моментално не им е колосално срање. Барем од стварите со кои јас дојдов во контакт. Agents of S.H.I.E.L.D. не е исклучок, и покрај некои одредени недостатоци. Забавна прва епизода, просечна, но далеку од лоша. Некако идејата за S.H.I.E.L.D. серија поубаво изгледаше само на хартија. Искрено, мислам дека нема повеќе од ова ниво да мрдне. Ќе и дадам шанса уште некоја епизода, иако јасно ми е што може да се очекува. 

Џос Видон е потпишан како режисер и еден од сценаристите. Другите двајца се брат му и некоја рендом цура чие име не ми значи ништо (има напишано епизода на Gods of the Arena). Не знам колкав е неговиот удел во пилотов, ама јасно може да се приметат некои негови моменти. На неколку места приметив кадри кои делуваа како излезени од The Avengers и штосови карактеристични за него.

Приказната е после филмот, како што не потсетија со 0.5 секунди флешбек од Авенџерс, околку колку што им дозволила лиценцата. Сериозно, толку ли е скапо да го прикажеш Ајрон Мен оклопот во серија? Видон пробува да го протне како фора, ама океј, јасно ни е на сите. Како и да е, S.H.I.E.L.D. продолжува да си функционира нормално. Колсон е жив, со објаснување кое намерно предизикува сомнеж во исправноста. Води тим на агенти кои се занимаваат со работи кои треба да бидат скриени од јавноста. Ништо што не можат неколку супер-херои да го средат, кои патем немаат пристап до истото ниво на класифицирани информации. Океј, ајде ќе пројдеме и низ тоа.

Она што го прави пилотот интересен, е всушност референците кон филмовите. Дури и главната приказна поврзува нешто што веќе сме го виделе. Што е секако океј, меѓутоа нема да можат ни пола сезона да се крпат вака. Жалам што не сум оптимист, сериозно не гледам каде би терала серијата. Доколку имаше поголем арк низ цела сезона, можеби ќе имаше поголеми шанси. Вака со секоја епизода посебна, не знам колкави се шансите да ме изненади, ама ќе почекам. Тој концепт ми е крајно досаден. 

Ликовите, освен Колсон не се интересни. Штета ако не ја задржат Марија Хил. Другите се нови, класичните шаблонски ликови кои нема да ги набројувам. Единствено може да се надеваме на негативци и споредни ликови. Гостување од "големиве" знам дека нема. А, баш тоа некако ја прави серијата да изгледа сиромашно и евтино на моменти. S.H.I.E.L.D. без Ник Фјури? Ни малку? Не мора Семјуел Л. Џексон, ама така би се нарушила конзистентноста која верувам дека Marvel сака да ја задржи.

Ќе ѕирнам уште некоја епизода. Ќе чекам да ме изненади. Инаку, DC видоа дека концептов можа да се реализира, па спремаат Gotham серија со млад Џим Гордон. Пред Бетмен, да...

Види такоѓе:

• Скокање кон заклучоци: Agent Carter

Анимиран суперхеројски фикс: Avengers Assemble

Годинава Disney XD ја замени популарната The Avengers: Earth's Mightiest Heroes со нова анимирана серија со наслов Avenger's Assemble. До сега излегоа осум епизоди од првата сезона и по кратка пауза последниве недели, серијата продолжува со прикажување од 15 септември. Причината за нова серија е едноставна. Marvel сака анимирана серија која ќе биде поблиска до филмот. Овие Авенџерс се истите од филмот, појачани со задолжителен црнец (покрај Ник Фјури), Фалкон. За жал, Avengers Assemble моментално добива лош третман од фановите, особено оние заколнатите во оргиналната серија. Донекаде хејтот е оправдан, ама не можам целосно да се сложам, зошто EMH никогаш не догледав. Новата е многу подетска, тоа го потврдувам.

Иако не е најдобрата анимирана серија на светот, доволна е за неделен фикс во ваков формат. Секогаш има простор за подобрување, а како што читав, следуваат и поинтересни негативци сезонава. Приказните се просечни, можат да поминат кај секоја слична серија со било кои ликови. Кога ги гледаш по ред, не обрнуваш внимание на лошите моменти, а тие секако ги има. Можеби во овие осум епизоди повеќе од што треба.

Ликовите ги знаеме сите. Последниве години се толку популарни и препознатливи што не е тешко да ги продаваш на млада публика. Меѓутоа, тој што е задолжен за пишување на серијава, очигледно мисли дека децата ги распознаваат ликовите по облеката и боите. Како резултат на овие, има ситуации каде само и по тоа се разликуваат. Ова е можеби најслабиот дел од Avengers Assemble, а е многу, многу битен. Без разлика на таргет групата, срамота е такво мрзливо пишување. Патем, вакви серии не гледаат само мали деца, туку и големи деца. Тие големи деца ќе ти ја посерат серијата на интернет. Тоа и го прават. Не знам дали на Marvel им се исплати да вложуваат во нешто што евентуално ќе згасне поради лоши рејтинзи. И, онака само бројот на гледачите ги занима. Зошто да немаме асална Авенџерс серија? Нешто што ќе биде повеќе од "океј е, онака"?

Анимацијата им е супер. Гласовите се погодени кај сите освен кај Тони Старк. Не го барам Роберт Дауни Џуниор и таа ненадминлива харизма, ама типов тука е на погрешно место. Старк треба да има поавторитетен глас, не да звучи ко копиљ што им носи пица у Stark Tower. Друга замерка ми е тоа што Хулк е постојано Хулк. До сега не се сеќавам дека го видов Брус Банер некаде. Баш тоа ќе ги мрдне стварите што ги спомнував горе. Малку развој на ликови, бре. Не е 18 минути пукање и бркање ко првата сезона The Clone Wars, ама може и повеќе од ова.

Ќе дадам шанса уште некоја епизода. Секогаш може да ги сменам со Earth's Mighties Heroes. Она новото со Хулк изгледа е почнато. Не знам какво е, некако сомнително ми делува...

П.С. Agents of S.H.I.E.L.D. премиера  за две недели!

Што после The Avengers?

Прашината што ја крена The Avengers сеуште е некако присутна. Во меѓувреме, и вестите за следните проекти на Marvel не сопираат. The Avengers не само што ја зацврсти основата на идните филмови, туку постави и нови граници, како за ликовите, така и за оние кои се одговорни за нивното пресликување на филмското платно (кое годинава за среќа е дел и од загушливи кино сали во вукојебини како што сме ние). Што доаѓа наскоро?

Iron Man 3 адаптира приказна која исторски гледно, го префрла ликот во модерно време, нудејќи освежена историја и потекло на оклопот на Тони Старк. Extremis (на Ворен Елис) ќе послужи како основа за третиот дел, каде што конечно ќе го видиме и неговиот најголем душман, Мандарин (Бен Кингсли, браво за изборот). Сабајлево го читав Extremis, приказната е одлична. Настаните некако соодветно би се надоврзале на тоа што досега го видовме во преходните два, со логичен прогрес на ликот и експанзијата на универзумот во кој е сместен. Технолошкиот скок напред на самиот Iron Man, значи и ниво погоре за предизвиците со кои и The Avengers би можеле да се соочат. Iron Man 3 доаѓа следната година, во мај.

Thor 2 почнува со снимање следниот месец, а премиерата е закажана за ноември 2013. За разлика од Captain America 2, изборот за режисер е некако поуверлив и сигурен. Алан Тејлор зад себе има огромен број на епизоди од серии со звучни имиња меѓу кои и Game of Thrones. Изборот дали е поради маркетинг, не е битно, битно е дека имаат човек кој може уште подобро да го пренесе Азгард.

Captain America 2 ги добива браќата Русо (Community) како режисери. Иако изборот е некако чуден, мислам дека воопшто нема никаков простор за сомнеж, зошто сценаристите се истите од првиот дел. Она што му треба на филмот е издржана приказна. Со The Avengers го 'проодеа' во денешно време, сега треба да го видиме како трча и дига лошотии на клоци, сам. Уште нема сериозни информации за приказната, а и има време, зошто филмот излегува за две години.

Продолжението на The Avengers е исто така неизбежно. Или после оваа тројка, или пред Captain America 2, во мај.

Види такоѓе:

• Години на Суперхерои

The Avengers (2012)

Дали е чудно што The Avengers испадна дека е најдобрата адаптација на Марвелов стрип? Не. Ќе беше чудно доколку не беше така. Не претерувам, успехот и парите што ги намлати се сосема оправдани. Кога ќе го земеш најдоброто од претходните остварувања и ќе го помножиш со два (во случајот на Hulk се множи со четири), ќе добиеш ваков резултат. Зад равенката, стои Џос Видон, кој заслужено си го ужива тронот минатава недела. Акција, забава, хумор и супер-херои за чиста десетка. Еве нешто на кратко, со ситни спојлери.

Сè она што го видовме во претходните филмови, кулминираше тука, во овие извонредни два и кусур саата. И тоа 3Д, во кино во кое едвај имаше кислород. Џос Видон успеа да го извади максимумот од секој лик и актер и да обезбеди доволно време, за сечија приказна совршено да се вклопи во големата сложувалка. За секој од нив има и соодветен вовед, во случај некој да ги пропуштил нивните стории во минатите филмови. 

Буквално сите блескаат, особено кога се соочени меѓу себе, со нивните маани и доблести. Особено сум изненаден од Семјуел Мадафакин Џексон како Ник Фјури и "новајлијата" Марк Рафало како Хулк. Повлекувам сè што мрчев за Рафало, дечкото е феноменален и си ја заврши работата подеднакво добро како и неговите колеги. Далеку подобар и од едниот и другиот пред него. Време е Хулк да добие трета шанса, па еве го и вистинскиот човек кој ја заслужува и успешно би можел да ја реализира. Останатите веќе се докажаа, особено Роберт Дауни Џуниор. Тврдам дека после него, не е возможно да се одигра Тони Старк толку добро. Сепак, мене најпозитивното изненадување ми беше Хулк. Браво.

На ваков супер-тим му е потребна и соодветна закана. Во потрага по коцката (Тесерактот) што ја видовме во Captain America, Локи, полу-братот на Тор, доаѓа на Земјата со не толку добри намери. Ник Фјури во Авенџерс го гледа единствениот спас, бидејќи само тие би можеле да се спротистават на она што доаѓа да предизвика општ хаос, почнувајќи од Њујорк, каде што и кулминира дејството. Меѓутоа, собирањето на ваков тим воопшто не е лесно, бидејќи членовите додека почнат да соработуваат, прво си ја мерат големината на сопственото его. Нивните конфликти се и најсимпатичниот дел од филмот, а кој не би сакал да види што ќе се случи кога Мјолнирот ќе удри во штитот на Капетан Америка или оклопот на Ајрон Мен. 

The Avengers е навистина квалитетно остварување, филм што ќе остане и за следните генерации. И, мило ми е што ни се пружи шанса оваа историја да гледаме во "реално време". Едвај чекам да видам што ќе донесат следните продолженија, како и продолженијата на Iron Man, Captain America и Thor. Ова е и најсериозниот кандидат за филм на годината, покрај Prometheus.

Години на Суперхерои

2012-та ќе биде занимлива година, барем поради филмовите кои треба да се појават тогаш. Адаптациите на американски стрипови стануваат се поквалитетни, публиката е побројна од било кога, па така што сосема има место и за три во една година. Нема да згрешам ако кажам дека Iron Man и The Dark Knight го однесоа овој жанр на едно друго ниво, вбризгувајќи му доза сериозност, муда и реалност, во која комплетно е замисливо постоењето на одреден лик/суперхерој. Доволно е само да се погледнат двете Марвелови адаптации од оваа година и останато е јасно. Нема потреба да зборувам колку се над Daredevil (Бен Асфлек, Колин Фарел) или Fantastic Four (ја памти некој Џесика Алба? Ни јас), кои повеќе беа парада на (тогаш) популарни актерски имиња отколку суперхеројски филмови или па адаптации на стрип. Примери има уште, дури и ако го заобиколиме неонскиот Batman & Robin од 1997.

Покрај The Avengers следната година, најмногу сум загреан за The Dark Knight Rises. Според Нолан, ова ќе биде неговата последна адаптација на Бетмен и веројатно последен Бетмен филм за оваа генерација. Не верувам дека некој во следниве неколку години ќе се обиде да направи нов филм, откако Нолан ќе ја заокружи неговата трилогија. А, верувам The Dark Knight Rises воопшто не е лесна задача, ако земеме во превид дека сеуште се осеќа влијанието на претходникот.

Иако сосема имав верба во Нолан и проектов на кој работи моментално, лично, не ми се допаѓа неговиот избор на негативци, а уште помалку изборот за актерката во улога на Кетвоман. Како и многу други, мислев дека ќе оди со Ридлер, негативец кој комплетно би се вклопил во универзумот. Со Ридлер како негативец и Нолан како режисер, верував дека ќе добиевме џам акционен-трилер, кој фино ќе се надоврзеше со The Dark Knight. Покрај тоа, Хит Леџер требаше да има cameo во филмот, меѓутоа се случи тоа што се случи. Бејн и Кетвоман како негативци ми се некако мали за да бидат во фокус, но ете, до некаде му успеа тоа со Скеркроу. Лошото чувство околу The Dark Knight Rises ми е најмногу поради вестите и сликите од сетот што се појавија, сепак, ги ставам парите на "Нолан нема да заебе".

Иако рано, Спајдермен ќе си добие нова адаптација. После оној третиот дел, јасно беше дека таа екипа со Тоби Мегваер и грозната Мери Џејн, Кирстен Данст, нема веќе што да каже. The Amazing Spider-Man го враќа Питер Паркер на самиот почеток, почнувајќи од ново. Ендру Гарфилд не ми е баш некој избор, ама па од друга страна Ема Стоун е супер, иако она тотално не прави разлика за тоа дали филмот ќе биде добар или не. Има трејлер, од таму може да се види дека ќе гледаме посериозен Спајдермен, дури и помрачен од вообичаено, нешто што знам дека ќе е различно од оној трет дел што го спомнав погоре. Уште неможам да се помирам со тоа колку беше ужас, а имаа шанса за добра приказна со Веном. Еве им свеж почеток, нова шанса да видиме добра адаптација, па и во неколку продолженија.

2013 е годината на Супермен и неговото враќање во Man of Steel. Кога спомнав враќање, ќе ја искористам оваа прилика да кажам колку беше погрешен оној Returns од 2006. Толку работи не чинеа во тој филм, што би ми одзело многу време да ги набројам сите. За чудо, Брендон Рут и беше толку лош колку што јас мислев дека ќе биде, ама... Тотално лош избор за Лекс Лутор, како прво. Кевин Спејси ми е во топ десет актери, ама не е за Лекс Лутор, особено не за Лекс Лутор како што беше напишан во лошото сценарио. Друга работа, никаква хемија помеѓу Лоис Лејн (исто тапа избор) и Кларк, повеќе личеа како да се четврти братучеди кои првпат на 30 години се запознаваат на селска свадба кај заеднички роднина. Дно. Приказната беше ужас исто и тука некаде приметувам дека повеќе го тупам со ова, него со тоа со кое имав намера. Man of Steel. Го режира Зак Снајдер, човек кој знае како се прави стрип адаптација (300, Watchmen). Приказната ја пишува Кристофер Нолан. Математиката е лесна нели? А, кој е Супермен? Хенри Кавил, дечко што претходно не го знаев, а сега го знам, и ми личи на тип што ќе може да се носи со улогата. Плус, ќе ги има Зод и Џор-Ел. Man of Steel мириса на добар филм уште сега.

Допрва ќе има новости околку филмовиве, па ќе се трудам да им посветам повеќе внимание тука.

The Avengers трејлер

Излезе трејлерот за The Avengers. Очекувам ова да биде еден од најдобрите филмови следната година, што e сосема оправдано бидејќи она што го видовме претходно од адаптациите на Марвел беше ептен добро.

На Земјата и се заканува опасност која бара интервенција од неколку супер-херои, кои S.H.I.E.L.D. ги регрутира како Авенџерс. Изгледа дека Локи е главниот негативец, приказната ќе се врти околу коцката од Captain America и конечно ќе го видиме Ник Фјури во повеќе сцени. Се надевам дека нема да претераат со Мајкл Беј експлозии како што има во некои сцени од трејлеров и дека филмот ќе има подобра музика од оваа тука. Исто така, актерот што го глуми Брус Банер некако не ми се свиѓа.

The Avengers излегува во мај следната година. Клик тука за трејлерот.

Види такоѓе:

• The Incredible Hulk (2008)
• Iron Man 2 (2010)
• Captain America (2011)
• Thor (2011)