Селење на Neverendless-WoW

Да, зошто мојата кариера како Blood Elf Paladin на OmegaWoW заврши откако го апдејтуваа серверот на 3.1.3 верзија и избришаа се што имав. 72 левел, без никаква опрема, без злато, без ништо...

Neverendless WoW е high xp rate сервер, баш каков што ми треба во моментов, зошто и немам баш многу време за трошење и левелирање на blizzlike сервери. Си направив Night Elf Druid (немам одамна играно Алијанса) и го кренав до 14-ти левел. Баш го начекав серверот во момент кога имаат технички проблеми, па сега почна да паѓа и на неколку минути. Утре ќе го мењаат хардверот и ќе биде во ред. Има околу 2000 онлајн играчи постојано, вендори што телепортираат до битни локации и нудат бесплатни бафови, гласање за опрема и минимален број на багови. Ме зачуди што работат некои квестови што не се сеќавам дека работеле на други приватни сервери. Плус, никогаш немам видено толку многу луѓе во Телдрасил како тука.

Ќе почекам до утре да го отстранат проблемот, да се излевелирам и асално да го видам Нортренд.

Family Guy: Почеток на осма сезона

Какво отварање на новава сезона Family Guy... Епизодите со наслов "Road to..." секогаш им биле меѓу најдобрите, а првава од осма сезона, "Road To Multiverse" инстантно ми стана омилена од ваквите. Нема да одам во детали, поради спојлери, туку ќе кажам само: Дизни универзумот. (океј, спојлер е)

Family Guy пичи напред и не познава граници. Сет МекФарлејн оди во крајности и знае како да испорача таков генијален хумор што се двои од било што друго денес на телевизија. Затоа е и толку успешен и стои зад моментално најдобрата анимирана хумористична серија. Сигурен сум дека следните пет сезони Family Guy ќе фура со истиот квалитет. Сезонава инаку требаше да почне со пародијата на The Empire Strikes Back, меѓутоа решија да ја одложат дури за крај, негде на пролет, заедно со пародијата на Return of the Jedi. Така ќе биде комплетна Star Wars пародијата што ја почнаа со "Blue Harvest".

American Dad прекинав да гледам негде на средина на четврта сезона. Досадно. Како МекФарлејн да си ги чува добрите идеи за Family Guy. Незнам што нуди The Cleveland Show, а не ни планирам да дознаам во брзо време.

Аниме на месецот: Bokurano

Кога го открив Bokurano, сосема случајно, и видов за што станува збор, се замислив само за количината на квалитетно аниме кое лежи закопано, неоткриено и натрупано со шунд од типот на Dragon Ball Z. Станува збор за генијална серија, речиси совршена и не ми е јасно како со години успеала да привлече внимание на толку малобројна публика. Не ме чуди како претходно немав чуено за Bokurano, а оргинално се има прикажувано во 2007.

Приказната на прв поглед делува наивно и детски. Група од 15 деца, скучуваат договор со сомнителен програмер, за учество во игра каде што ја бранат Земјата од напади на mecha роботи управувајќи со нивниот робот Zearth. Е, сега Bokurano е борба со роботи, колку што Lost е авионска несреќа на пуст остров. Bokurano е приказна за животот, пожртвуваноста, личните приоритети, завиена во чудовишниот Zearth. Уникатна СФ приказна, на моменти дури потресна и сурова. Цената која се плаќа за да се одбрани сопствената планета и животите на блиските не е воопшто мала, а е уште полошо кога се нема избор.

Малку ме разочара крајот, не очекував така да заврши, но доколку завршеше поинаку, ќе се изгубеше поентата. Сепак, крај со малку поинтензивни настани, не е лоша идеја. Bokurano има 24 епизоди, брзо се гледа, само бара малку повеќе внимание и трпение на почетокот. Пак ќе повторам, анимето не е борба меѓу mecha роботи, иако првите неколку епизоди делуваат така.

За крај, линк до најавната шпица. Песнава ми е хит откако ја слушнав првиот пат.

Transformers: Revenge of the Fallen (2009)

Да го гледав Transmorphers: Fall of Men, можеби вториов Трансформерс немаше да биде најлошиот филм за 2009. Не дека имав големи очекувања, но сигурно не се надевав на толку глупости во еден филм што трае неиздржливи 150 минути. Ефтин хумор како во Американска Пита 9, цел саат непотребни сцени, олигофренични Трансформери и никаква конзистентност во приказната, го спречуваат Transformers: Revenge of the Fall да добие и прелазна оценка. Последните 30 минути прекинав и да следам што се случува.

Ајде по ред. Има еден куп тинејџерски комедии каде што главниот лик заминува на колеџ, родителите му се со незавиден коефициент на интелегенција, па целиот хумор се базира на комбинација од овие елементи. Нема никаква поента да го гледаме истово и во Трансформерс филм. Голем дел од непотребните сцени што ги спомнав, се баш со овие очајни обиди за хумор. На другата страна се двата Автоботи што зборат на црнечки сленг, што голем број фанови, а и медиуми, ги искритикуваа дека поттикнувале расна дискриминација. Искрено, ме здоболе за тоа. Јас ќе ги искритикувам продуцентите за дебилниот потег, што го преполниле филмот со вакви идиотизми, далеку од било каков хумор. Не верувам дека за наменети за помладата публика, освен ако филмов нема некоја едитирана верзија каде што се тргнати бројните вулгарни реплики.

Кога Transformers: Revenge of the Fallen не се обидува да биде комедија, има "сериозни" сцени со Трансформери кои изгледаат како биолошки да остареле, имаат метална брада, бастун и се сенилни. Иако можат да изразуваат и силни емоции, ова не престана да ми биде чудно.

Шаја и Меган Фокс ми станаа најодвратните фаци во Холивуд, така да нема да потрошам ни збор повеќе за нив од оваа реченица. Филмов нема никаква приказна, туку е колаж од случајно нафрлани сцени, така да на секои 10 минути скока во друг хаотичен правец. Бидејќи сите ликови имаа по вкупно 8 минути време, не видовме никаков развој, а камоли Трансформери. Освен ако немало Трансформери во неколку сцени со експлозии кај што има само чад, оган и метал и едвај може да се забележи било што. Елементот за забава е сведен под нулата, не ми се верува дека нешто што е базирано на искучително забавна серија/линија играчки може да има ваков исход. За жал, ни специјалните ефекти не го вадат, денес и А1 Метео има исти такви...

Првиот беше подобар. Сега е време конечно Transmorphers да добие шанса.

Првата епизода на FlashForward

Ноќеска беше прикажана првата епизода на новата серија FlashForward. Рип со лош квалитет од епизодава почна да се врти низ интернетов уште пред една недела, но решив да почекам. Само што ја изгледав првата епизода и сум задоволен од серијава. Интересен почеток, успеа да покрене еден куп мистерии што верувам дека ќе се објаснуваат споро како во Lost. ABC добро знаат дека ваков тип на серии проаѓаат кај публиката.

За приказната пишав во минатиот пост. Сите луѓе во светот, во исто време губат свест и додека се во таа состојба, свеста им е пренесена шест месеци во иднината. Значи, секој си добива 2:17 минути флеш од неговиот живот во иднината. Кога ќе се разбудат, ќе го затекнат светот во (буквално) катастрофална состојба. Причините се непознати, а главниот лик, ФБИ детективот Марк Бенфорд, започнува истрага. Дали е таен експеримент на Владата, вонземјани, природен феномен или нешто друго, се надевам ќе дознаеме за период пократок од три сезони.

Споредбата со Lost е сепак неизбежна, бидејќи има куп референци и горе-долу работите се одвиваат со сличен интензитет баш како и пилот-епизодата на Lost. Дури има и Oceanic Airlines билборд. Ликовите делуваат стандарни за ваква серија, но мислам дека самиот концепт на FlashForward дополнително ќе ги менува и обликува, бидејќи нивните цели и мотиви допрва треба да бидат дефинирани. Вака, на прв поглед делуваат како купче ликови извадени од Lost или било која друга драма. Актерската екипа е составена од познати фаци, а камео имаше и Сет Мекфарлејн. Ме изненади кога се појави, не очекував, а сега читам дека ќе се појавува и понатаму.

Серијава носи огромен потенцијал во себе, речиси како Heroes во првата сезона, пред комплетно да заебе. Но, Lost е при крај, па мислам дека ABC нема да дозволи FlashForward да отиде во погрешна насока. Почетокот беше одличен, ајде да видиме уште една квалитетна серија.

Почнаа сериите...

Септември е месецот кога поголемиот дел од сериите што ги следам редовно, почнуваат со новите сезони. Минатата недела започна The Office, а оваа ги донесе новите епизоди на The Big Bang Theory и How I Met Your Mother.

The Office имаше одличен почеток на сезонава, иако по просечната петта сезона немав којзнае колку големи очекувања. Хуморот спласна, ликовите некако се истрошија, но со последнава епизода успееа да ме убедат дека сепак серијава може да испорача свеж хумор. Отварањето на епизодата е веќе класика, веднаш си најде место меѓу најдобрите отварања на The Office епизода. Шест сезони до сега, не верувам дека Тhe Office ќе истрае уште долго, но очекувам многу подобра сезона од минатата. Првата епизода од новава сезона може да се симне преку овој линк.

The Big Bang Theory е релативно млада серија, сега започна третата сезона. Серијава ја следам од почетокот и веднаш успеа да ми го привлече вниманието. Не знам уште колку долго четирите физичари ќе се обидуваат да функционираат заедно со не толку интелегентната комшика, пред да стане досадно, но сега за сега серијата е феноменална. Последнава сезона почнаа премногу да го форсираат ликот на Шелдон, многу повеќе отколку што треба, па додека им снема материјал, Шелдон ќе заврши носејќи ја цела серија на негов грб, што воопшто не ми се допаѓа. Пред и Шелдон да стане досаден, се надевам дека ќе се посветат и на развој на другите ликови, зошто веќе почна да се осеќа сенката која тој ја фрла.

How I Met Your Mother ја избегнував долго време, за летово конечно да седнам и да изгледам четири сезони за една недела. Класичен ситком, ништо што веќе не сме виделе до сега. Но, некако ликовите ми се многу посимпатични од класичните ситком ликови, ситуациите ми се многу пореални, само што со самиот концепт на серијата, знаев дека нема How I Met Your Mother нема уште долго да трае. Петтава сезона се надевам дека ќе биде последна. Веќе немаат каде со приказната, станува монотоно, а Барни, кој што беше еден од движечките елементи во серијата, доживеа трансформација која не му прилега на ликот, меѓутоа наговестува правец кој е одличен за добар завршеток на серијава. Се надевам дека нема да има враќање назад, зошто на сите ни е здосадено да чекаме да се открие мајката на децата на Тед. :) How I Met Your Mother можеби и нема да ја следам секоја недела редновно, зошто ми е многу позгодно да изгледам неколку епизоди по ред.

Остана уште Family Guy наредната недела и вечерва Flashforward. The Clone Wars продолжува во октомври. South Park не следам веќе цела сезона. Толку од South Park, затупеа исто како The Simpsons. А, Lost, дури во јануари следната година...

Сите на куп: The Expendables

Пред година дена го поставив прашањето, Кој сега ќе го спаси светот? и одговорот е веќе во пост-продукција. Сталоне успеа да ги убеди Шварценегер, Долф Лундгрен, Брус Вилис, Џет Ли, Џејсон Статам, Мики Рурк заедно со Ерик Робертс и куп други, да се соберат на едно место и да го направат најдобриот акционен филм на сите времиња. Или најлошиот.

The Expendables можеби е меч со две острици. Или ќе ги круниса кариерите на актерите кои немаат уште многу до пензија, или невозможната опција, да бидат исплукани и да го загубат угледот кај фановите, како што тоа му успеа на Брус Вилис со Live Free or Die Hard. Невозможна, бидејќи главниот адут на филмот се баш сите овие имиња на едно место, па не верувам дека некој ќе остане рамнодушен или разочаран. Барем сите знаеме што да очекуваме.

Приказната е едноставна. Тим на врвни платеници, се испратени на мисија во Јужна Америка да го убијат диктаторот што ја тероризира околината со години. Шварценегер и Брус Вилис ќе имаат помали улоги, Шварценегер верувам дека нема ни да го приметиме. Ми фалат Курт Расел (не бил заинтересиран за ол-стар филм), Жан Клод Ван Дам (одбил, ко да има други филмови за снимање), Дени Трехо (каде без него?!), Вин Дизел, а Стивен Сегал одбил бидејќи имал недоразбирања со продуцентот. Чак Норис никој не го ни прашал, зошто најверојатно и на Сталоне му е дојдено преку кур од Чак Норис.

Тоа што ме секира, се двете планирани продолженија. Пред се, пола од актерите горе се доволно зрели за пензија, а не се Харисон Форд за да бидат кул и на 90 години, плус сите имаат доволно пари и ќе направат уште многу со филмов. Беспотребни продолженија со пола постава или Кристијан Бејл, не фала.

The Expendables ќе излезе во август 2010. Има време. За продолженија, подобро да нема. Меѓутоа, Сталоне не се дава, во 2011 Rambo V: The Savage Hunt.

Се спрема Индијана Џонс 5

Ги обожавам сите Индијана Џонс филмови, па дури и Kingdom of the Crystal Skull. Филмот беше исплукан и од критиката и од фановите, најмногу поради крајот, што верувам дека никој не очекуваше да отиде во таа насока. Но, како да заборавиле дека Индијана Џонс филмовите секогаш содржеле голема доза на фантанзија и имале такви, нереални краеви. Приказната беше одлична, реализацијата совршена како за Индијана Џонс филм, со оглед на годините на Харисон Форд и недостатокот на некои ликови од минатите филмови.

Деновиве кружи изјавата на Харисон Форд кај што спомнува дека приказната веќе завзема некаква форма и се чека на сценарио. Верувам дека Лукас и Спилберг ќе ги имаат негативните критики во предвид и дека нема да се занесат со толку екстремни експериментации, туку ќе понудат приказна која би била прифатлива за старите фанови. Јас лично би сакал да го видам Инди во потрага на Атлантида.

Е, сега. Иако би гледал било што со Харисон Форд како Индијана Џонс, па макар и да управува mecha роботи во село во Јапонија, петтово продолжение некако ме плаши. Не поради годините на Форд, туку поради Шаја ЛаБаф. Имаше неколку моменти во Kingdom of the Crystal Skull каде што можеше да се превиди црна иднина за серијалот и искрено се надевам дека нема да доживеам да видам како друг го носи шеширот на Индијана Џонс. А, најмалку му стои на ЛаБаф. Дури, ако се доволно паметни, ќе има мала улога во следново продолжение, бидејќи и неговиот лик имаше удел во создавањето на лошата слика за претходниот филм. Да сум јас Лукас или Спилберг, ќе го вратам Џон Рис-Дејвис.

За филмов, ќе мора да почекаме до 2012. Се надевам дека работите ќе одат во добар правец и дека ќе го видиме филмов.

Marvel: Ultimate Alliance 2 и за PS2

Сеуште има издавачи на игри кои не сакаат да го напуштат PS2 пазарот и ми е многу мило поради тоа. Activision на 15-ти септември го пушта во продажба второто продолжение на Marvel: Ultimate Alliance и за PS2. Играта можеби не е меѓу најдобрите што може да се најдат за PS2, но е единствената што дозволува играчот да си состави четворочлен тим од најдобрите херои на Marvel и да праи покољ наоколу. Брзо здосадува, но некако успеа да пројде кај мене, бар додека не ги пробав сите комбинации на херои што сакав.

Не очекувам вториов дел да биде многу поразличен, пред се затоа што знаеме кои се графичките перформанси на PS2 и до каде може да се оди. Од аспект на игривост, ова ми делува поинтересно за играње бидејќи Marvel Ultimate Alliance 2 делумно ќе биде базирана и на Civil War. Хероите се скоро истите од минатиот дел, го има Hulk, а сеуште го нема The Punisher. Ќе ја симнам кога ќе излезе, па ќе пишам рецензија.

За повеќе информации, трејлери и скриншоти, трк на официјалниот сајт.

District 9 (2009)

Изминативе години ретко се налетува на оргинален СФ филм, кој излегува од досадните клишеа кои сме навикнати да ги гледаме. Откако The Matrix ја измени дефиницијата на жанрот и внесе свежина во Холивуд, ги видовме неправедно потценетиот K-Pax и генијалниот The Man From Earth, два филма кои ми се омилени СФ драми, кои се доказ дека филмовите од овој жанр можат да бидат многу повеќе од скапи специјални ефекти. За несреќа, К-Pax некако се заборави, а The Man From Earth помина речиси незабележан, без разлика што двата филма имаат неоспорлив квалитет.

District 9 ќе остане запамтен, моментално го добива секое внимание од критиката и публиката, се надевам дека култниот статус кој го доби дури прерано, нема да биде нарушен со лоши продолженија.

Филмот можеби и нема оргинален пристап на раскажување (има и други вакви филмови, да), но е убедлив, реалистичен и неговиот квалитет се базира токму на тоа. Браво за феноменалната режија. За приказната, освен малиот вовед, нема што да кажам, а да не биде спојлер. Вонземски брод доаѓа на Земјата (лебди расипан на Јоханесбург) и вонземјаните се приморани да го продолжат животот во областа наречена District 9, каде што владее општ хаос поради дивјачката природа на не толку интелегентните посетитли. Дел од мештаните на Јоханесбург се приморани да живеат со војземјаните, со што работите се дополнително искомплицирани. Ми се допаѓа тоа што во филмов режисерот Бломкамп р'же и на бесконечната себичност и животинското однесување на луѓето, како што тоа мајсторски го прави Ромеро во неговите зомби филмови. Треба само повеќе да се обрне повеќе внимание за да се видат сите овие пораки кои ги има во изобилие, некаде и толку директно што е изненадувачки.

Ефектите нема да ги коментирам, бидејќи одамна прекинаа да ме фасцинираат. Денес, буквално се е можно со CGI и ништо веќе не ме изненадува. Значи, тука правиме муабет за исклучително добар филм, со муда и силна поента. Додека не го гледам Inglorious Basterds, District 9 е филмот на годината, а нешто ми кажува дека така и ќе остане...

Rambo 5: Како да закопаш мртов серијал?

Веќе е официјално дека новиот Рамбо (Rambo V: The Savage Hunt) ќе биде СФ. Се шпекулираше дека во новото продолжение, Рамбо ќе млати мексички дилери и ќе разбива трговија за луѓе, за конечно деновиве тие гласини да бидат заменети со официјалната вест, дека Рамбо ќе се соочи со хибриден мутант, продукт на генетички експерименти. Изгледа дека Сталоне го стигнале годините (сега има 63) и веќе не знае што прави, па ќе лови експериментални суштества. Темата сама по себе можеби и не е толку лоша (иако веќе сто пати обработена), но спакувана во Рамбо филм е претерано одбивна и ми звучи како заебанција.

Минатото продолжение, колку и да сакам да одрекувам, беше лошо. На прво гледање, филмот е интересен, но со секое наредно, станува неподнослив. Паметно ќе му беше да ја заврши кариерата со The Expendables. Имам некаква верба во филмот, бар ќе го памтевме Сталоне по добро.

FlashForward: Замена за Lost?

Крајот на Lost се наближува, а ABC веќе има нова серија, која би требало да биде некаква замена, бидејќи жанрот е сличен, а верувам дека ќе пробаат да ја одржуваат на телевизија со слични финти како Lost.

FlashForward почнува со мистериозен глобален феномен кој трае 2:17 минути, каде што сите луѓе истовремено ја губат свеста и се гледаат себе шест месеци во иднината. Ова резултира со бројни сообраќајки и слични несреќи, многу мртви и повредени, по што настанува општ хаос. Главниот лик е ФБИ агентот Марк Бенфорд кој се обидува да дознае што навистина се случило.

Ова звучи ептен интересно, само да не испадне како со The 4400. Пилотот феноменален, а останатото ѓубре што сме го виделе милион пати претходно. Дека ќе биде Lost, тешко. Дека ќе проба да се извади со сличен концепт, да. Барем така делува.

Серијата почнува со прикажување на 24-ти септември и за првава сезона се планирани тринаесет епизоди. Трејлерот може да се погледне тука.

Dharma Initiation Kit - колекционерско издание на петтата сезона на Lost

Уште неколку месеци до почетокот на последната сезона на Lost. Очекувам да видам квалитетни епизоди, каде конечно ќе се разрешат мистерииве што никнуваа изминативе пет години. Петтата сезона можеби имаше лош почеток и за малку ќе се откажев, но понатаму епизодите стануваа се подобри и подобри и имаше интересно финале што отвори еден куп нови прашања. Правецот го знаеме, сега останува да видиме како ќе се одвиваат работите.

Кон крајот на годинава, ABC ќе издаде специјален колекторски сет со цела петта сезона, лимитирана едиција и веќе може да се нарача од Амазон. Вреди за парите, само незнам како е со достава кај нас. Сеуште нема листа на работите што се вклучени во сетот, освен ова што се гледа на сликата. Покрај ДВД-јата со епизодите, има Dharma VHS ориентационо видео, мапи, документи, налепници...