Linux: Нов Почеток

Моето прво искуство со Линукс, за жал непријатно (беше интересно на почетокот!), беше лани со Ubuntu дистрибуцијата. Понесен од желбата да испробам нешто ново, згрозен од проблемите кои низ годините ги трпев со Windows, се одлучив за слободен софтвер. Знаев дека е различно, читав, пробував live цедеа, читав, правев муабет со искусни Линуксаши... Створив слика за Линукс и за тоа што тој претставува, и почнав да ги разгледувам дистрибуциите кои ми ги препорачуваа, односно кои биле погодни за почетници. По кратката употреба, сфатив дека Ubuntu не е за мене. Додуша, можеби премногу бев навикнат на благодетите (ха!) кои ги нуди Windows, едноставноста при користење и сл. Освен тоа, не бев навикнат на толку честа употреба на конзола.

Како почетник, можам да кажам дека Ubuntu не е за почетници. Знам дека е индивидуална работа, но сепак, на прв поглед, неубаво изгледа (океј, се подесува изгледот), чуден е за работа... Се трудев некое време да го засакам, понекогаш успевав, но на крај пак завршив со Windows XP...

SuSE 10.2

Кога веќе живеев со мислата дека Линукс ќе го оставам за некои подобри времиња, налетав на SuSE 9. WOW! Први импресии: поубав, полесен, user-friendly. Личи на Windows. Се решив дека ова ќе биде мојот нов Линукс. Излезе openSuSE 10.2. Го симнав. Лесен е за инсталација, го инсталирав сосема сам, додека за Ubuntu-то мораше да барам помош од Линукс експерти, кои верувам дека ако би ги спомнал на блогов, би ми заклале на спиење. :)

Се решив, утепав цел ден во правење backup и ослободување партиција. Собрав храброст, рестартирав, го ставив ДВД-то. Се бутираше. Бев изненаден од едноставноста што ја нуди openSuSE 10.2, инсталацијата е речиси иста како на Windows XP. Моментално сум во фаза на конфигурирање на SuSE-во, и го прилагодувам на моите потреби. Ќе пишам повеќе кога ќе се спастрам. До тогаш, на почетници како мене, им го препорачувам SuSE 10.2. Ако грешам, ќе видите сами. :)